Цæгат Ирыстоны хицауады уæнгтæ æрдзырдтой республикæйы ахсджиаг фарстатыл

Республикæйы коронавирусы инфекциимæ медицинон æххуысмæ чи цæуы, уыдоны нымæц 26,8% фæкъаддæр. Уый тыххæй Аппаратон æмбырды фехъусын кодтой Уæрæсейы фæлхасгæнджытæм цæстдарды управленийы специалисттæ. Хæцгæ низ кæмæ рабæрæг, уыдоны нымæц 4,9% фæкъаддæр. Цæгат Ирыстоны сæргълæууæг Сергей Меняйло бабар кодта медицинон туаггуыры станцæты арæзтад фæтагъддæр кæнын. Æрбынат кæндзысты республикæйы 4 дзæбæхгæнæндоны бындурыл. Уымæй уæлдай ма республикæйы фæзындзæн туаггуыры завод. Афтæмæй уавæр зынгæ фæрогдæр уыдзæн. Ныртæккæ рынчындæтты цы туаггуыр ис, уымæн скодтой экспертизæ. Йæ хатдзæгтæм гæсгæ æппæт домæнтæн дæр дзуапп дæтты. Уый тыххæй æмбырды фехъусын кодта Уæрæсейы æнæниздзинадмæ цæстдарды службæйы регионы разамонæг Ольга Давыдова. Хицауады уæнгтæ ма æрдзырдтой æрдæгарæзт æмæ заууат бæстыхæйттыл. Сергей Меняйло бабар кодта æппæт объектты реестр снысан кæнын æмæ рахæссын раст уынаффæ цæрджыты пайдайæн. Зæгъæм, Мидхъуыддæгты министрады училищæйы æмæ Хæххон-металлургон техникумы æмдзæрæны бæстыхæйттæ. Ацы объекттæ хъуамæ суой, социалон нысаниуæг кæмæн ис, ахæм бынæттæ. Республикæйы сæргълæууæг йæ хъус æрдардта Гæмæх хохы рæтæнвæндагмæ дæр. Кæд йæхæдæг хæлд æрцыдис, уæддæр дзы баззад бетонæй конструкцитæ. Цæмæй горæты фæлгонц ма халой, уый тыххæй сæ хъæуы айсын. Дарддæр æрныхас кодтой, паддзахадон программæтæ æмæ национ проекттæм гæсгæ цы объекттæ арæзт цæуы, уыдоныл. Объектты иу хайæн тæссаг у, афойнадыл эксплуатацимæ лæвæрд кæй не 'рцæудзæн, уымæй. Премьер Дзанайты Барис районты разамындæн бабар кодта уавæрмæ лæмбынæгæй кæсын æмæ æмгуыст кæнын дзуапдæттæг министрадтимæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv