Фыццаг кварталы республикæйы рабæрæг кодтой 2 мин адæймаджы æнæ фæллойадон бадзырдæй чи кусы, ахæмтæ. Уыдонæй мин æмæ `рдæг сты амалхъом адæм æмæ хæдбар кусджытæ. Дзуапдæттæг комитеты сæрдар Платы Альбинæйы ныхæстæм гæсгæ, фæсаууонмæ куыстгæнджыты нымæц фæкъаддæр кæныны хъуыддаджы хуыздæр бæрæггæнæнтæ æвдисы Дзæуджыхъæу, Дыгуры, Æрæфы æмæ Æрыдоны районтæ. Уыцы архайд кæнынц муниципалон къамистæ.  Платы Альбинæйы ныхæстæм гæсгæ, паддзахадон æххуыс у ахъаз санкциты рæстæг уавæр фæхуыздæр кæнынæн. Афтæмæй, куыстдæтджытæ фæстауæрц кæнынц æхцайы фæрæзтæ æмæ сæ бахæссынц кусджытæн мызд фидыны фондмæ. Ныридæгæн уал уыцы нымæц у 50 милуан сомы. Зæгъæм, Æрæфы хуыйæн фабрикæйы разамонæг Таухъазахты Ирбег радзырдта, комитет сын цы æртæ милуан сомы рахай кодта, уыдоны фæрцы бахъахъхъæдтой 42 куысты бынаты. Дзанайты Барис бафæдзæхста уæлдай æргом рауагъдонтæ куыст агурыны мадзæлттæм фылдæр æргом аздахын. Цæгат Ирыстоны рæзы туристон къабаз æмæ уырдæм дæр хъæуынц дæсны специалисттæ.