73 сидзæр сывæллонæн 2020 азы рахай кæндзысты ног фатертæ

Цæгат Ирыстоны сидзæр сывæллæттæн федералон закъоны фæлгæты 2019 азы рахай кодтой 66 фатеры. Ацы аз та фæнд кæнынц ацы хъуыддаджы баххуыс кæнын 73 адæймагæн. Фатертæ сты цæрынмæ хорз цæттæгонд. Валентина Дмитриева зæрдæрухсæй дзуры, йæ ног фатеры тыххæй. Валентæнæйæн йæ ныййарджытæ фæндаггон фыдбылызы фæмардысты. Йæ баба æмæ йæ нана схъомыл кодтой. 8 азæй фылдæр æнхъæлмæ касти, цæмæй йын цæрæн бынат рахай кæной. Ныр, йæ къухы бафтыд æмæ йын у уæлдай æхсызгон. Валентина Дмитриева: «Алы адæймагæн дæр хъуамæ уа бинонтæ æмæ хæдзар дæр. Афтæ рауад æмæ уыдонæй хайджын нæ уыдтæн. Мæхи хæдзар мын кæй уыдзæн, ууыл мæ зæрдæ дæр нал дардтон. Фатер куы федтон, уæд дисы бафтыдтæн. Афтæ аив æмæ райдзаст кæй уыдзæн, уый æнхъæл нæ уыдтæн. Ис дзы æппæт коммуникацитæ дæр. Район дæр мæ зæрдæмæ тынг цæуы». Валентинæйы фатер у нырыккон домæнтæм гæсгæ цалцæггонд. Химæ зилæн уат дæр хъæугæ дзауматæй ифтонггонд у. Уыимæ ма дзы сæвæрдтой электрон тых æмæ газ нымайæн гæрзтæ дæр. Валентинæйæн æрæджы фæзынд йæхи бинонтæ дæр. Хæстæгдæр рæстæг фæнд кæны хæдзары хъæугæ дзауматæ æрбаласын æмæ ног фатеры æрцæрын. Хи хæдзар фæзынд Бæцæзаты Сæрмæтæн дæр. Лæппуйыл цæуы 19 азы. Сидзæрæй баззад, уæд йыл 10 азæй йедæмæ нæ 'цыд. Ныртæккæ ахуыр кæны Цæгат Ирыстоны Паддзахадон Университеты 1-æм курсы. Куыд зæгъы, афтæмæй йæ бæлвырдæй зоны, цавæр дзауматæ йын уыдзæн йæ фатеры, уый. Цæрæнбынат у цалцæггонд. Ис дзы æппæт коммуникацитæ. Ифтонггонд у хибарæй хъармгæнæн системæйæ дæр. Бæцæзаты Сæрмæт: «Æппæты ахджиагдæр у - хи хæдзар. Мæнæн дæр кæй фæзынд, уый мын тынг æхсызгон у. Цыбыр рæстæгмæ дзы æрцæрдзынæн. Дуар куы байгом кодтон, уæд стыр æмæ цалцæггонд фатер федтон. Мæ зæрдæ дзы райы. Бузныг дæн, чи нын баххуы кодта, уыдонæн». 2019 азы ног фатерты дæгъæлтæ радтой 66 сидзæрæн республикæйы алы районтæй. Федералон æмæ республикон бюджеттæй ацы хъуыддагæн рахай кодтой 87 милуан сомæй фылдæр. Куыст цæуы сæрмагонд федералон закъонмæ гæсгæ. Куыд æххæстгонд цæуы, уымæ йæ цæст дары республикæйы сæргълæууæг Битарты Вячеслав. Профилон ведомствæйы куыд фæбæрæг кодтой, афтæмæй иннæ азтимæ абаргæйæ, цæрæн бынæттæ цы сидзæртæн радих кодтой, уыдоны нымæц фæфылдæр. Анжела Мамаева: «2019 азы цæрæн бынæттæ дихгонд æрцыд 10 проценты фылдæр 2018 азимæ абаргæйæ. 2018 азы æлхæд æрцыд 60 цæрæн бынаты. 2019 азы та - 66. 2020 азы пъланмæ гæсгæ уыдзысты 73». Ныртæккæ æххæстгæнæн хицауады уæнгтæ цæттæ кæнынц хъæугæ гæххæттытæ. Цæмæй афоныл самал кæной цæрæнбынат. Фатеры хæрзхъæддзинадмæ стыр домæнтæ ис. Цæрæуат хъуамæ уа цалцæггонд. Ифтонггонд уа хъæугæ гæрзтæй. Сæйрагдæр та уа цæрынæнбæзгæ. Фарстамæ æппынæдзух йæ хъус дары республикæйы хицауады сæрдары хæдивæг Азымты Иринæ. Сидзæр сывæллæттæм цæстдард хицауады сæйрагдæр хæстæй иу. Уымæ гæсгæ сæ баххæст кæнын хъæуы афоныл æмæ бæстонæй. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv