Дзуццаты Элизæ æртæ азы дæргъы кусы психологæй
Æгъуыссæджы ныхмæ Элизæ арæх рафыссы алыхуызон цайгæрдæджытæ. Фæлæ йæ хъæддыхæй зоны ӕцӕг æвдадзы хос фæлмæн ныхас, кæй у, уый. Адæймаджы фарсмæ балæууын, æрсабыр æй кæнын, ныфс ын бавæрын. Уæд фесæфдзæн йæ тыхст, баууæндзæнис дыл æмæ дын раргом кæндзæн цы йæ хъыгдары, уый. Лæмбынæг æмæ дæсны, искæй рис чи бамбара, ахæм специалист. Элизæйæн йæхицæн дæр йæ хъысмæт æнцон нæ рауад. Æмгъуыдæй раздæр райгуырд. Йæ мад Ларисæ нын куыд радзырдта, афтæмæй медицинон аххосæгты тыххæй райгуырд церебралон параличимæ. Æрыгон ныййарæгæн йæ ныфс нæ асаст. Элизæйыл дыууæ мæйы куы сæххæст, уæд куыстмæ рацыд. Райдыдта чызгимæ архайын. Мад хорз арæхсы массаж кæнынмæ. Æрвылбоны процедурæты 'руаджы дохтыртæ ныфс кæмæй нæ æвæрдтой, уыцы саби йæхиуыл фæхæцыд. Элизæ ныр æртыккæгæм аз психологæй кусы республикæйы ахуырадон кусæндæттæй иуы. Æмдзæрæны йæм бонмæ æххуысмæ æрбацæуы дæсгай студенты. Зæрдæхæлар æмæ цæстуарзон чызгæн раргом кæнынц тынгдæр сӕ цы фарстатæ тыхсын кæнынц, уыдон. Психолог иуы дæр æнæ æрхъуыдыйæ нæ ауадзы. Удуæлдайæ сын балæггад кæны. Психолог суæвын Элизæйы фæндыд скъоладзауæй фæстæмæ. Йæ бæллицмæ сæххæст кæныныл æвæллайгæйæ архайдта. Йæ æнгом æмæ стыр бинонтæ та алкæддæр уыдысты йæ фарсмæ. Æмæ дзæгъæлы нæ. Элизæ æнтыстджынæй каст фæци Цæгат Ирыстоны паддзахадон университеты психологон-педагогон факультет. Æрæджы та райста магистры диплом. Абон Дзуццаты Элизæ йæ куысты бынат ницæуыл баивдзæн. Хæссы йын æрмæст æхцондзинад. Чызг фидарæй зоны æмæ йæхи дæнцæгæй æвдисы хъыгдæрд æнæиниздзинадимæ адæмæн сæ царды арæнтæ ӕвӕрд кæй нæй.
Æгъуыссæджы ныхмæ Элизæ арæх рафыссы алыхуызон цайгæрдæджытæ. Фæлæ йæ хъæддыхæй зоны ӕцӕг æвдадзы хос фæлмæн ныхас, кæй у, уый. Адæймаджы фарсмæ балæууын, æрсабыр æй кæнын, ныфс ын бавæрын. Уæд фесæфдзæн йæ тыхст, баууæндзæнис дыл æмæ дын раргом кæндзæн цы йæ хъыгдары, уый. Лæмбынæг æмæ дæсны, искæй рис чи бамбара, ахæм специалист. Элизæйæн йæхицæн дæр йæ хъысмæт æнцон нæ рауад. Æмгъуыдæй раздæр райгуырд. Йæ мад Ларисæ нын куыд радзырдта, афтæмæй медицинон аххосæгты тыххæй райгуырд церебралон параличимæ. Æрыгон ныййарæгæн йæ ныфс нæ асаст. Элизæйыл дыууæ мæйы куы сæххæст, уæд куыстмæ рацыд. Райдыдта чызгимæ архайын. Мад хорз арæхсы массаж кæнынмæ. Æрвылбоны процедурæты 'руаджы дохтыртæ ныфс кæмæй нæ æвæрдтой, уыцы саби йæхиуыл фæхæцыд. Элизæ ныр æртыккæгæм аз психологæй кусы республикæйы ахуырадон кусæндæттæй иуы. Æмдзæрæны йæм бонмæ æххуысмæ æрбацæуы дæсгай студенты. Зæрдæхæлар æмæ цæстуарзон чызгæн раргом кæнынц тынгдæр сӕ цы фарстатæ тыхсын кæнынц, уыдон. Психолог иуы дæр æнæ æрхъуыдыйæ нæ ауадзы. Удуæлдайæ сын балæггад кæны. Психолог суæвын Элизæйы фæндыд скъоладзауæй фæстæмæ. Йæ бæллицмæ сæххæст кæныныл æвæллайгæйæ архайдта. Йæ æнгом æмæ стыр бинонтæ та алкæддæр уыдысты йæ фарсмæ. Æмæ дзæгъæлы нæ. Элизæ æнтыстджынæй каст фæци Цæгат Ирыстоны паддзахадон университеты психологон-педагогон факультет. Æрæджы та райста магистры диплом. Абон Дзуццаты Элизæ йæ куысты бынат ницæуыл баивдзæн. Хæссы йын æрмæст æхцондзинад. Чызг фидарæй зоны æмæ йæхи дæнцæгæй æвдисы хъыгдæрд æнæиниздзинадимæ адæмæн сæ царды арæнтæ ӕвӕрд кæй нæй.