Бæрæгбоны арфæтимæ балц

Ахуырады къабазы кусджытæ дæр абон цин кодтой. Ахуырад æмæ наукæйы министр Азымты Иринæ æрцыд Елхотмæ. Бæрæгбоны агъомæ нæ республикæйы сгуыхт ахуыргæджыты барæвдыта арфæйы фыстæджытæй æмæ лæвæрдтæй. Хуыздæр ахуыргæнджытимæ базонгæ нæ уацхæссæг Гогаты Марат. Сæрæн, хъаруджын æмæ цардæфсæст. Кæд рæстæг иу ран нæ лæууы æмæ азтæ цæуынц, уæддæр ма Иванченко Елизаветæйы зæрдæ тавынц ахуыргæнæгæй куы куыста, уыцы бонтæ. Йæ скъоладзауты нæмттæ ныр дæр ма нæ ферох кодта. Алы хатт сæ куы фены, уæд йын æнæ арфæтæйы ныхæстæ зæгъгæйæ æмæ алыхуызон цаутæ æрымысгæйæ хæзбон нæ фæзæгъынц. Ацы хатт дæр йæ зæрдыл æрлæууыд йæ цардвæндаг. Йæ царды хуыздæр азтæ æнæвгъауæй балæвар кодта скъолайæн. Фæлæ сыл иу усм дæр фæсмон нæ кæны. Фæлтæрддзинад хъуымæ кæй уа, уый зоны æмæ йæ бынат суæгъд кодта æрыгон специалистæн. Цы кæстæрты схъомыл кодта, уыдонæй сæрбæрзонд у. Уæлдай æхсызгон ын у, Азымты Иринæ дæр, Елизаветæ хуызæн йæ дæсныйад математикæимæ кæй сбаста. Йæ зонынзинæдтæ та рæдауæй лæвæрдта скъоладзаутæн.Иууылдæр æй зонынц, Иринæ ахурыгæнæгæй кæй куыста æмæ йæ арæх кæй æрымысы, уый. Алы фæлтæрты минæвæрттæ, 2 ахуыргæнæджы кæрæдзиуыл зæрдиагæй бацин кодтой. Æрхъуыды кодтой Фыдыбæстæйы Стыр хæсты цаутæ дæр. Нæ республикæйы ахуырад æмæ наукæйы министр Иванченко Елизаветæйы схорзæхджын кодта арфæйы фыстæгæй. Ахæм лæвæрттимæ æрбацыд Льянты Ритæмæ. Уый дæр у Советон Цæдисы Сгуыхт ахуыргæнæг. Цæрæнбонты фæкуыста географийы ахуыргæнæгæй. Уыцы куыстмæ æй чи йæ сразæнгард кодта, уый зын бамбарæн нæу. Ритæйыл цæуы 92 азы. Фæлæ йыл рæстæг нæ фæтых. Цыфæнды куыстмæ дæр цырдæй æмæ рæвдзæй бавналы. Куыд зæгъы, афтæ уыд раздæр дæр. Зивæг никуы ницæмæ кодта. Цы хæрзиуджытæй йæ сбузныг кодтой, уыдонмæ дæр кæсы раздæры цæстынгасæй. Æмæ кæд сæ хуыз аивтой, уæддæр ын, раздæрау зынаргъ, кадджын æмæ ахсджиаг сты. Æппæты фыццаг мæ фæнды абон кæимæ фембæлдтæн, уыцы ахуыргæнджытæн арфæ ракæнын. Уымæй уæлдай ма бæрæгбоны арфæтæ кæнын республикæйы ахуыргæнджытæн се ппæтæн дæр. Æнæниз , æнæмаст, хъæлдзæг æмæ нын амондджын ут. Мæ зæрдæ дарын, мæнæ ахæм уазæгуаты цыдæй хорз традици кæй рауайдзæн æмæ алы аз дæр алы бæрæгбоны фæдыл дæр нæ æхуыргæнджытæн арфæтæ кæй кæндзыстæм. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv