Цымæ чи?

Цæгат Ирыстойнаг спортуарзджытæ, Гасситы Мурат кæй рамбулдзæн, ууыл гуырысхо дæр нæ кæнынц. Уырны сæ, не `мзæххон ирон богал йæ фыды уæзæгмæ уæлахиздзауæй кæй æрыздæхдзæн, уый. Йæхæдæг куыд зæгъы, афтæмæй йын йе `мбæстæгтæ ныфс дæттынц. Йæ фарсмæ кæй уыдысты, уый та йын йæ тыхыл тых æфтауы. Футболæй дунеон чемпионат ахицæн ис,фæлæ спортуарджытæн сæ цины стъæлфæнтæ ныр дæр ма цæхæртæ калынц. Хæстæгдæр рæстæг сæм æнхъæлмæ кæсы боксы бæрæгбон. Дунеон чемпионыном райсыныл тох кæндзысты Гасситы Мурат æмæ Украинæйы минæвар Александр Усик. Уый спорты ахсджиагдæр цау у. Æрбангом кодта алы кары æмæ социалон къордты адæмы, æрыгон лæппуты, суанг ма чызджыты дæр. Тедеты Виктория: «Афтæ мæм кæсы, æмæ мæ зæрдæ ныллæуудзæн, афтæ тыхсын, мæнмæ гæсгæ афтæ мын никуы уыд. Мурат ахæм адæймаг у, æмæ йын алкæй зæрдæ зæгъы хорздзинад. Бокс æппындæр нæ уарзын, уарзын футбол, фæлæ мæм ацы цауы раз, футболæй дунеон чемпионат дæр ницы уал кæсы. Тыхсын тох куыд ацæудзæн». Уыцы тох йæхæ цæстæй фенын кæй фæнды, уыдон абалц кодтой Мæскуымæ. Чи хæдтæхæгыл-арвы мигътæ нымайгæйæ, чи та поездыл. мураты фарсхæцджытæ канд нæ бæстæйы алы горæттæй не сты, фæлæ суанг фæсарæйнаг бæстæтæй дæр. Фæндагыл сæхи цæттæ кæндзысты, фæнды сæ боксæй хæсты рæстæг национ зарджытæй Мураты уæлдай ныфс бауадзын. Ахæм æххуыс ын рамбылынæн ахъаз уыдзæн. Йæ уæнгты та хъуамæ æгæрон тых бауадзы, зæгъынц спортуарзджытæ Туаты Андрей: «Лæппутимæ нын чысыл къаорд ис æмæ æппынæдзухдæр фæархайæм исты цымыдисаг хъуыддаг саразыныл. Афтæ нæм фæкаст æмæ Мураты тохмæ адæмы Мæскуымæ куы арвитæм, уæд хорз æмæ хъæугæ хъуыддаг уыдзæн. раздæр нæм адæм æрæмбырд зын хъуыддаг фæкаст, фæлæ сæхæдæг дæр разæнгардæй цыдысты махмæ. Нæ хъуыды се ппæты зæрдæмæ фæцыд». Тох уыдзæн райсом, 21-æм июлы спортивон комплекс «Олимпийски»-йы. Билеттæ нал ис. Кæд сæ аргъ 2000-æй 100 000 мины онг уыд, уæддæр. Фæнысан кæнын хъæуы уый, æмæ ацы ерыстæ фæнд кодтой Саудаг Аравийы. Фæлæ Уæрæсейы боксы федераци бацархадта, цæмæй ацы стыр æмæ цымыдисаг цау Уæрæсейы ацæуа, ууыл. Дунейы Чемпион боксæй Гасситы Мурат: «Уæлдай нæу тох кæм ацæудзæн, уый. Фæлæ спортыл æнувыд чи у, уыдонæн хъæуы саразын ахæм уавæртæ, цæмæй сын тохмæ æрбацæуын зын ма уа. Цæмæй адæм æнцонтæй æрбацæуой, куыд Украинæйæ, афтæ Уæрæсейæ дæр. Мæнмæ гæсгæ Мæскуыйæ хуыздæр бынат ссарын зын уыд». Цæгат Ирыстонæй ерысмæ ацæуыны фадат кæмæн нæй, уыдон дæр æнæрхъуыдыйæ нæ баззадысты. Зæгъæм, хæхæн хъæу Гæлиаты цæрджытæ боксæй хæстмæ кæсдзысты комкоммæ трансляцийы фæрцы. Уæдæ Дзæуджыхъæуы цæрджытæн та горæты сæйраг фæзы — тæрхондоны галуаны раз сæвæрдзысты стыр экран. Йæ дæргъ 6 у йæ фæтæн та 4 метры. Уымæ гæсгæ Сæрибардзинады фæзы чидæриддæр уа, уыдонæн сæ бон уыдзæн 2 тыхджындæр боксеры ерысмæ бакæсын. Райсом зæххы къорийы алы къуымтæй дæсгай мин адæймаджы базондзысты боксæй дунеон чемпион чи суыдзæн,уый. Цæгат Ирыстоны æмæ Уæрæсейы цæрджытæ зæрдæ дарынц уыцы ном Гасситы Мураты кæй хæсдзæн, ууыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv