Æппæтуæрæсеон адæмон фронты минæвæрттæ, историон æмæ культурон нысаниуæг цы объекттæн ис, уыдоныл æр

Культурон нысаниуæг цы объекттæн ис, уыдоны уавæр ныртæккæ æхсаинаг у. Уый тыххæй бæрнон кусджытæ фарста хорзы рдæм аивыты тыххæй аразын сæрмагонд æмбырдтытæ æмæ бынæттæм балцтæ. Абон Цæгат Ирыстоны адæмон фронты уæнгтæ рацыдысты радон рейды. Ацы хат æрзылдысты культурон нысаниуæг объекттыл. Сæ хатдзæгтæм гæсгæ, Паддзахадон культурон объекттæ чи хъахъхъæны уыцы департаментмæ ныффыстой курдиат, цæмæй республикæйы историон цыртдзæвæнтæ цалцæггонд æрцæуой. Ныридæгæн Нузалы фидары иу хаймæ базылдысты, фæлæ Дзæуджыхъæуы цы фидар уыд, уыцы къул та у æдзæллаг уавæры. Дзæуджыхъæуы Зортовы уынджы цы хъахъхъæнæн къулы хай ма лæууы абон, уый арæзт æрцыд 1859 азы. Уæд Кавказы хæст ма йæ тæмæны уыд, æмæ ацы къулы ахадындзинад стыр уыд. Ныртæккæ хаст у федералон нысаниуæг кæмæн ис, уыцы историон объектты хуыгъдмæ. Ныр бынтон заууатмæ æрцыд. Фæзынд дзы стыр хуынчъытæ, стæй хæлын дæр райдыдта æбæрæг аххосæгтæм гæсгæ. «Фæрсæй кæсгæйæ ацы къулыл диссагæй ницы ис. Фæлæ, йын ис æгæрон историон нысаниуæг. 1960 азы йæ бахастой историон нысаниуæг кæмæн ис, уыцы объектты номхъыгдмæ. Ахæм объекттæ нæ горæты бирæ ис, фæлæ сæ фылдæр хай сты горæты центры. Ныртæккæ къулæн йæ уавæр хуыздæртæй нæу. Фидаргонд йыл уыд сæрмагонд фæйнæг дæр, уым фыст уыди, историон объект кæй у, æмæ йæм æвналæн кæй нæй, уый. Фæлæ йæм уæддæр чидæр йæ ныфс бахаста», — паддзахадон бюджетон уагдон «Наследие Алании»-йы директор Габойты Людмилæ. Габойты Людмилæ куыд зæгъы, афтæмæй хæстæгдæр рæстæг хъуамæ арæзт æрцæуой æмбæлгæ уавæртæ, цæмæй къул бынтон ма ныккæла, уый тыххæй. Дарддæр Æппæтуæрæсеон адæмон фронты минæвæрттæ араст сты Алагиры районмæ. Уым, Буронæй уæлдæр, цы зæронд арæнгæсуат "Зылын дуар" æмæ фæндаджы хай ис, уыдон дæр хаст сты федералон нусаниуæгимæ историон объектты номхыгъдмæ. Фæндаджы уæлейы ма ис хъахъхъæнæн мæсыг. Ацы историон комплекс, специалистты ныхæстæм гæсгæ ирдæй æвдисы, хохы цæрджытæн куыд ахадгæ уыдысты фæндæгтæ. Стæй, куыд хорз арæхстысты сæ аразынмæ дæр. «Иуæрдыгæй ам цæуы Траскам, Кавказы ахсджиагдæр трассæ. Иннæрдыгæй та уынæм ацы историон объект. Хъыгагæн, фæндагæн йæ иннæ хæйттæ абон нæ бон фенын нал у. Алагиры районы хъахъхъæнæн объекттæй иу уыд. Уыимæ ма, рагон фæндæгты арæзтад куыд бæрзонд æмвæзадыл уыд, уый æвдисæн дæр у. Фæлæ, фæстаг рæстæг хæлын райдыдта. Бæлæстæ йыл зайын райдыдтой. Сæ уидæгтæ та объектæн стыр зиан хæссынц», - Габойты Людмилæ. Ацы объектмæ дæр æвæстиатæй æргом аздахын хъæуы. Габойты Людмилæйы ныхæстæм гæсгæ, афтæмæй ахæм бынæттæ хъуамæ æмбæлгæ уавæры уой, цæмæй сæ туристтæ дæр уыной. Цы бæлæстæ дзы рæзы, уыдон аиуварс кæнын хъæуы. Æппæтуæрæсейон фронты минæвæрттæ историон объекттæм сæ цæст рагæй дарынц. Культурон нысаниуæгимæ объектты хъахъхъæныны паддзахадон комитетмæ курдиат бахастой, цæмæй заууат уавæры цы объекттæ сты, уыдонмæ се 'ргом аздахой. Æппæтуæрæсейон фронты минæвæрттæ дарддæр æмгуыст кæндзысты профилон æмæ бæрнон ведомствæтимæ, цæмæй нæ республикæйы историон объекттæ сæфтмæ ма рцæуой. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv