Ахсджиаг æмæ хъæугæ

Цæгат Ирыстоны ахсджиаг социалон объектты цæуынц радон басгæрстытæ. Ацы хатт Нæ республикæйы сæргълæууæг Битарты Вячеславы нысанмæ гæсгæ йæ æхсæнадон æххуысгæнджытæ бабæрæг кодтой Дзæуджыхъæуы тагъд æххуысы рынчындон. Æркастытысты, хостæ дзы фаг ис æви нæ, уымæ, стæй ма медицинон кусæнгæрзты хæрзхъæддзинадмæ дæр. Уымæй уæлдай ма, гинекологон æмæ гастроэнтерологон корпусты цалцæггæнæн куыстытæ куыд цæуынц, уый дæр федтой. Гастроэнтерологон корпус тагъд æххуысы рынчындоны сæрнизтæй иу у. Ам цалцæггæнæн куыстытæ уæвгæ цæугæ дæр никуы кодтой. Бæстыхай хъæуы рацаразын. Рынчындоны сæйраг дохтыр Мытцыты Астан куыд зæгъы, афтæмæй дзы куыстытæ ацы къуыри райдайдзысты. Уæдæ гинекологон хайад дæр хуыздæр уавæры нæй. Уый бындуронæй цалцæг кæнын райдыдтой. Рынчынты рæстæгмæ арвыстой республикон клиникон рынчындонмæ. Цæмæй ма раппæлой, уый тыххæй радзырдта дзæбæхгæнæндоны сæйраг дохтыр. РЦИ-Аланийы тагъд æххуысы клиникон рынчындоны сæйраг дохтыр Мытцыты Астан: «Тагъд æххуысы клиникон рынчындоны сæйраг дохтыр.  Ивгъуыд аз байгом кодтам æппæты нырыккондæр лаборатори. Нæ иртæстыты хатдзæгтимæ разы вæййынц Уæрæсейы раззагдæр клиникæты дæр. Травматологийы, гастроэнтерологийы æмæ гинекологийы къабазты кусæм нырыккон технологитæм гæсгæ». Нæ республикæйы сæргълæууæджы æхсæнадон æххуысгæнджытæ басгæрстой рынчындоны сæйраг хайæдтæ: травматологи, терапийæ, стæй хирургион хайад. Аныхас кодтой рынчынтæ æмæ дохтыртимæ. Уыдон куыд зæгъынц, афтæмæй фæстаг дыууæ азы хостæй цух не `ййафынц. Уый фадат дæтты тагъд æххуыс бакæнынæн. Пациенттæ дæр ницæмæй хъаст кæнынц. Дарддæр араст сты цæстыты низтæ дзæбæхгæнæн клиникæмæ. Æхсæнадон æххуысгæнджытæ уайтагъд сæ цæст æрæвæрдтой аив æмæ райдзаст кæртыл. Разыйæ дзы баззадысты. Клиникæйы разамонæг Дзгойты Иринæйы бафарстой, цавæр аиуварсгæнинаг хъуыддæгтæ сæм ис, уымæй. Æхсæнадон æххуысгæнджытæ ма разыйæ баззадысты техникон цæттæдзинадæй. Операцион блокы кусæнгæрзтæ æппæты нырыккондæр сты. Дыууæ мæйы размæ сæ самал кодтой. Фыццаг операцитæ скæндзысты тагъд рæстæджы. Æхсæнадон æххуысгæнджытæ сæ куыстæй разыйæ баззадысты. Ахæм иртæстытæ сты ахсджиаг æмæ хъæугæ. Арæх сæ саразынц. Æрмæст фæстаг цалдæр мæймæ дæр бабæрæг кодтой республикæйы 40 медицинон уагдоны. Ууыл æрлæууынмæ нæ хъавынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv