Мæскуыйæ Цæгат Ирыстонмæ байгом кодтой ног рейс

Мæскуыйæ Цæгат Ирыстонмæ байгом кодтой ног рейс. Авиакомпани «Смартавия»-йы хæдтæхæг фыццаг хат æрбадт зонон Бæслæны аэропорты. Нырæй фæстæмæ рейсытæ уыдзысты къуыри фондз хат. Цæгат Ирыстонæй бæлцæтты хæццæ кæндзысты Мæскуыйы аэропорт "Домодедово"-мæ. Сабаты-иу уырдыгæй хæдтæхæг Дзæуджыхъæумæ ратæхдзæн 15 сахаты æмæ 5 минутыл, Дзæуджыхъæуæй та- фæстæмæ аздæхдзæн 18 сахаты æмæ 20 минутыл. Къуырисæр, æртыццæг, майрæмбон æмæ хуыцаубоны хæдтæхджыты куыст рæстæгмæ гæсгæ уыдзæн æндæрхуызон. Мæскуыйæ - Дзæуджыхъæумæ уæлдæфон нау тæхдзæн 17 сахаты æмæ 10 минутыл, фæстæмæ - изæры 8 сахаты æмæ 30 минутыл. Хæдтæхæджы хуыз у «Боинг-737», зæгъгæ. Цæгат Ирыстон промышленность æмæм транспорты министр Хайдарбек Бутов куыд зæгъы, афтæмæй ног рейсы руаджы билетты аргъ дæр фæкъаддæр уыдзæн. Хайдарбек Бутов, РЦИ-Аланийы промышленность æмæ транспорты министр: «Ног рейс кæй фæзынд, уый фæрцы нæ республикæйы æмæ сыхаг регионты цæрджытæн фадат уыдзæн равзарын кæцы бон, æмæ кæцы рæстæг æнцондæр у Мæскуымæ абалц кæнын, уый. Стæй бæлцæттæн Мæскуыйы кæцы аэропортмæ хуыздæр у сæ фæндаг акæнын, уый дæр. Цæгат Ирыстоны ног авиакомпани кусын кæй райдыдта, уый тыххæй æнхъæлмæ кæсæм, билеттæ кæй фæасламдæр уыдзысты, уый». Аэропорт «Владикавказ»-ы генералон директор Сергей Чалов: «Ногдзинæдтæм нæхи цæттæ кодтам зымæгæй нырмæ. Фæфылдæр кодтам нæ кусджыты нымæц дæр. Æмбарæм æй, аэропортыл фылдæр уæз кæй цæудзæн, уый. Ныридæгæн, нæ авналæнтæ уæрæхдæр сты. Июлы мæй аэропортæй абалц кодтой 51 мин адæймаджы». Беслæны аэропорты хицауады ныхæстæм гæсгæ, афтæмæй бæлцæттæ фылдæр уыдзысты. Ног рейсмæ сæхи цæттæ кодтой рагæй. Цæмæй бæлцæттæ мацæмæй стыхсой, уымæн саразтой алыхуызон мадзæлттæ. Регистраци кæнынæн байгом кодтой ног бынæттæ, уымæй уæлдай ма ныр аэропорты ис ног бизнес-зал дæр. Хицауад фæнысан кодта, тагъд рæстæджы ма иу ног рейс кæй уыдзæн уый дæр. Уый та Дзæуджыхъæуæй - Санкт-Петербургмæ тæхдзæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv