Æдас фæндаг

Фæндагмæ `ввахс цы бæлæстæ зайынц, уый хæдтулгæ скъæрджытæн хатгай свæййы æцæг сæрниз. Къалиуты аххосæй фæндаджы фæзилæнтæ хорз нæ фæзынынц хатгай. Ахæм уавæр та арæх расайы уæззау фæстиуджытæм. Зæгъæм, Архонкæйы станицæйæ Фарныхъæумæ фæндаг æдасдзинады домæнтæн дзуапп нæ лæвæрдта. Уымæ гæсгæ республикæйы фæндæгты хæдзарад уынаффæ рахаста, шофырты цы бæлæстæ хъыгдарынц, уыдон акалын. Фæндаджы былгæрæттæ сыгъдæг кæнынмæ бавнæлдтой 3 къуырийы размæ. Уæдæй нырмæ уал бындзарæй ахауын кодтой 700 бæласмæ `ввахс. Шофыртæ бацин кодтой. Арæх-иу зæронд бæлæсты æмбыд къалиутæ фæндагмæ æргæр-гæр кодтой. Дымгæ сыстад, уæд-иу фæдагыл уæвгæ дæр азмæлæн нал уыд. Дæ хæдтулгæ кæд цы къодахы бын бахаудзæн, уый бæрæг нæ уыдис. Фæндагыл ахæм уавæрты цæуын цæлхдурты сæрты гæппытæй уæлдай нæу. Куыстытæ чи `ххæст кæны, уыдон бæлæсты биографи хорз сахуыр кодтой. Куыд зæгъынц, афтæмæй сæ ныссагътой ивгъуыд æнусы 60-æм азты. Уал азмæ ма æфсæйнаг дæр бамбийы, уæд бæлас та хъуамæ цы кæна? Куыд рабæрæг, афтæмæй ма дзы акалын хъæуы 200-мæ `ввахс бæласы. Фæуæрæхдæр уыдзысты шофырты фæлгæсæн фадæттæ, иумæйагæй æдасдæр уыдзæн фæндагыл змæлыны `гъдау. «Бæлæстæ акалæм, сæ бындзæфхæдтæ сын скъахæм, аласæм сæ. Фæндаджы былгæрæттæ хъуамæ сыгъдæг уой. Ацы егъау зайæгойтæ, арвмæ 20-гай метртæ чи фæцыд, уыдон бамбыд сты. Ницыуал пайда сæ ис, зиан йеддæмæ ницы хæссынц. Цас сæ тагъддæр айсæм ардыгæй, уыйас хуыздæр», - куыстытæ æххæстгæнæг организацийы директор Дзодзиаты Тамерлан. Æппæт ацы куыстытæ кæнынц фæндæгты райрæзты паддзахадон программæйы фæлгæты. Канд ацы фæндаджы уадултæ нæ ныддасдзысты. Рæхджы фæндæгты хæдзарады республикон комитет уыцы куыстытæм бавналдзæн æндæр рæтты дæр. Хæстæгдæр сæ кæм райдайдзысты кæнын, уыдонæй уал фæнысан кæндзыстæм Мичуриныхъæуæй Хъæдгæронмæ уаддзаг. Асыгъдæг ма кæндзысты Мæздæджырдæм фæндаг дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv