Дзанайты Барис видеобастдзинады руаджы архайдта бæстæйы президенты æххуысгæнæг Максим Орешкины

Хицауады сæрдар Дзанайты Барис видеобастдзинады руаджы архайдта бæстæйы президенты æххуысгæнæг Максим Орешкины разамындимæ сæрмагонд æмбырды. Ныхас дзы цыд «Сильные идеи для нового времени», зæгъгæ, форумы фарстатыл æмæ уæрæсейаг ног хуыздæр брендтыл. Стратегион хъæппæристы генералон директор Светлана Чупшевайы ныхæстæм гæсгæ, æркасты сæйраг нысан у æнтыстджын бредтæн сæ райрæзты фæдыл æххуыс Уæрæсейы æппæт регионты дæр. Форум расидтысты стратегион хъæппæристы агентад æмæ Росконгрессы Фонд. Мадзалы руаджы компанитæ фæуæрæхдæр кæндзысты кондады хъомыс, продукцийы базарад, уыимæ ма рахиздзысты федералон æмвæзадмæ. Цæгат Ирыстон форумы æнтыстджынæй архайдзæн. Хыгъды – хойраджы продукци, информацион технологитæ æмæ креативон индустрийæтæ. Дзанайты Барис куыд фæнысан кодта, афтæмæй форум у хорз гæнæн ныры уавæрты хи раргом кæнынæн, уымæ гæсгæ йæм хъæуы бæстонæй бацæттæ кæнын.