Республикæйы инвестицион программæмæ Хицауады радон æмбырды бахастой ивддзинæдтæ

Республикæйы инвестицион программæмæ Хицауады радон æмбырды бахастой ивддзинæдтæ. Уый тыххæй фехъусын кодта экономикон райрæзты министры хæдивæг Дзоблаты Зураб. Инвестицион программæ нысангонд у ацы азæй 2022-æм азтæм. Цы ногдзинæдтæ йæм бахастой, уыдон баст сты Аланийы аргъуыды 1100 азы бæрæгбонимæ. Кадджын мадзæлттæ фæнд кæнынц 2022-æм аз саразын. Культурон нысаниуæг кæмæн ис, уыцы цыртдзæвæнты рацарæзтæн снысан кодтой уæлæмхасæн фæрæзтæй 18 милуан сомæй фылдæр. Рацаразын бахъæудзæн рагон алайнаг чырыстон аргъуантæ. Сæ фылдæр сты кæлæддзаг уавæры. Уыимæ ма сцалцгæн кæнын хъæуы, сæ фарсмæ цы инженерон-техникон хызæгты æмæ санитарон-техникон бæстыхæйттæ ис, уыдон дæр. Нæ бæстæйы президент Владимир Путин паддзахадон æмвæзадыл бабар кодта 2022 азы Аланийы 1100 азы аргъуыды бæрæгбон сбæрæг кæнын. Уый тыххæй бардзырд бафыста 2017 азы 16 октябры. Стыр бæрæгбонмæ мадзæлттæ цæттæ кæнынц. Уыимæ ма фæнд кæнынц байгом кæнын Александр Невскийы номыл аргъуан дæр. Æнæхъæн Цæгат Кавказы уыдзæн æппæты егъаудæр. Дзоблаты Зураб куыд фæнысан кодта, афтæмæй бюджетон иумæйаг инвестициты бæрцыл ацы хæрдзтæ нæ фæбæрæг уыдзысты. Республикон инвестицион программæйы фæстуæрцгæнæн фæрæзтæ баисты 73 милуан сомæй фылдæр. Уæ зæрдыл уын æрлæууын кæндзыстæм, Цæгат Ирыстоны комкоммæ æххуысы инвестицион программæ хицауад сфидар кодта ивгъуыд аз, декабры. Сбæлвырд æй кодтой министрадты, ведомствоты æмæ муниципалон скондты курдиæттæм гæсгæ. 2020-æм азы иумæйаг фæрæзты бæрц у 384 милуан сомæй фылдæр, 2021-æм аз - 371 милуаны, 2022-æмы та - 274 милуан сомы. Хицауады æмбырды ма снысан кодтой фæцæрыны æппынкъаддæры бæрц. 2019 азы уыцы бæрæггæнæн уыд 9 мин 231 сомы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv