Полилигвалон системæ Цæгат Ирыстоны скъолаты æмæ рæвдауæндæтты парахат кæны

Полилигвалон системæ Цæгат Ирыстоны скъолаты æмæ рæвдауæндæтты парахат кæны. Сывæллæтты уыцы-иу рæстæг ахуыр кæнынц ирон æмæ уырыссаг æвзагыл. Ахæм системæ сфидар кодтой «Ирон æвзаджы национ æмæ культурон рæзты» сæрмагонд программæйы фæлгæты. Ахæсдзæн 2020-æм азмæ. Ацы фæткæвæрд хорз кæй кусы, уымæн æппæты хуыздæр æвдисæн у Алайнаг гимназ. Ахуырад дзы йæ райдианæй нырмæ цæуы æрмæстдæр нæхи мадæлон æвзагыл. Иннæ ахуыргæнæндæтты тыххæй куы дзурæм, уæд уым полилингвалон ахуырад ногдзинадыл нымад у нырма дæр. Куы фæзынд, уæд æм специалисттæ æмæ æхсæнад дывæр цæстæй бакастысты. Иутæ йæ фарс рахæцыдысты, хорз хъуыддаг у зæгъгæ, ирон æвзаг бахъахъхъæнынæн. Иннæтæ та дызæрдыг кодтой, сывæллæттæ, дам, иронау куы ахуыр кæной æппæт предметтæ, уæд фæстæдæр уыцы зонындзинæдтæ кæм бахъæудзысты? Ныр дæр ацы фарста дзырддаг у. Уæлдайдæр ныййарджыты ’хсæн. Полилингвалон системæмæ гæсгæ кæм кусынц, уыцы скъолатæ æмæ рæвдауæндæтты сæйраг хæс у архайын, цæмæй сывæллæттæ сабибонтæй æрмæст уырыссаг нæ, фæлæ ма сæ мадæлон æвзаг дæр хорз зоной. Куыд æй уарзой æмæ йыл куыд дзурой. Цавæр æнтыстдзинæдтæ бафтыд, полилингвалон системæмæ гæсгæ цы сабитæ ахуыр кæнынц, уыдоны къухы, уый бæлвырддæр базонынмæ абалц кодтон Джызæллы 2-æм скъоламæ. Фыццæгæм къласы сабитæ иронау ахуыр кæнынц математикæ, алфамбылайы дуне, физкультурæ æмæ музыкæ. Къласы ис 16 сабийы. Ахуыргæнæджы ныхæстæм гæсгæ, кæд бирæ рæстæг нæ ахуыр кæнынц нырма, уæддæр сабитыл зынгæ фæбæрæг. Арæх кълæсты æрмæст ирон сабитæ нæ вæййы, уымæ гæсгæ ахуыргæнæг йæ куыст аразы куыд ирон, афтæ уырыссаг æвзагæй пайда кæнгæйæ. Сабитæ кæд зындзинæдтимæ æмбæлынц, уæддæр тынг цымыдисæй архайынц, ахуыргæнджытæ куыд зæгъынц, афтæмæй. Уæлдай рæвдздæр кусынц математикæйы урокты. Ныридæгæн фыццæгæм къласы ахуырдзаутæ базыдтой æфтауын æмæ æппарын. Зонынц иронау алыхуызон фигурæтæ. Кусынц сæрмагонд чингуыты бындурыл. Сывæллæттæн сæхи дæр бафарстам, куыд цæуы сæ зæрдæмæ ахæм хуызы ахуыр. Цы нын загътой, уымæ байхъусæм. Фæлæ хъуыддаг бынтон афтæ хорз ма зынæд. Ныййарджытæй бирæтæ хъаст кæныныц, тæрсынц, ома, сывæллæттæ ныртæккæ сæ предметтæ иронау ахуыр кæнынц, фæлæ райдиан кълæстæй ахизгæйæ, зындзинæдтимæ сæмбæлдзысты, зæгъгæ. Уымæн æмæ 5- æм къласæй уæлдæр предметтæ ахуыр кæнынц уырыссагау. Æмæ уæд куыд уайы. Сывæллон йæ райдианæй алцыдæр ахуыр кæны ирон æвзагыл, стæй та нфидаргонд полилингвалон пълан кæронмæ куы æрхæццæ вæййы, уæд рахизы уырыссагау йæ зонындзинæдтæ фидар кæнынмæ. Хорз æви æвзæры ’рдæм фæбæрæг уыдзæн, уый нырма зын зæгъæн у. Хицæн дæнцæджытæй хаттдзæгтæ куы кæнæм, уæд уавæр дызæрдыккаг уайы. Фæлæ специалисттæ куыд зæгъынц, афтæмæй дзы зæрдæхсаинагæй ницы ис. Æмбарын нын кæнынц, ныртæккæ дæр скъоладзаутæ сæ ахуырадон процессы рæстæг уырыссаг æвзагæй цух кæй не`сты. Æрмæг иронау куы нæ фембарынц сабитæ, уæд сын æй уырыссаг æвзаджы руаджы дæр бамбарын кæнынц. Системæйæн йæ ном дæр йæхиуыл ис - полилингвалон. Полилингвалон системæ кусын райдыдта 2017 азы. Парахат кæны, зæгъгæ куы зæгъæм, уæд æппындæр ницæмæй фæрæдийдзыстæм. Ныртæккæ уыцы фæткæвæрдмæ гæсгæ кусынц скъолайты æмæ рæвдауæндæтты. Фæлæ, хъыгагæн, цæуыл сæмбæлæн ис фылдæр хатт? Бинонты ’хсæн дæр иронау бирæтæ нал дзурынц! Диссаг ма уый у, æмæ районтæм, хъæутæм дæр куы акæсæм, уæд уым дæр фарста райхалинаг у. Уавæр хорзы ’рдæм аивын кæй фæнды, уыдонæн фадат ис рæвдауæндонæй райдайын. Полилингвалон къордты архайынц, 2 азы кæуыл сæххæст вæййы, уыцы сабитимæ. Нывгæнгæйæ, алыхуызон фигурæтæ аразгæйæ, стæй зарядкæ кæнгæйæ дæр сабитимæ дзурынц иронау. Цас арæхдæр хъусой ирон ныхас, уыййас ыл тагъддæр æмæ хуыздæр фæцалх уыдзысты, хъомылгæнджыты ныхæстæм гæсгæ. Аргъæуттæ æмæ æмдзæвгæтæ дзурыныл къорды сабитæ зæрдæргъæвдæй архайынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv