Зæххы мидӕг цы æрдзон хъæздыгдзинæдтæ ис, уыдон ссарынæн аразгæ интеллектæй спайда кæнын, кæнæ картофы ног мыггаг рауадзын æмæ йæ схонын «Ирон». «Зонад æмæ зонадон-техникон политикæйы» закъон æххæст кæныны фæлгæты республикæйы сарæзтой равдыст. Уæлдæр ахуырадон уагдæтты студенттæ адæмы рæгъмæ рахастой æнтыстджын проекттæ. Сæ фылдæр сты, æмбал кæмæн нæй, ахæмтæ. Æдæппæтæй райтыгътой 10 фæзуаты. Уæлдæр ахуырадон уагдæттæ æмæ зонадон центртæ сæ ног æнтыстдзинæдтæ кæм равдыстой, 10 ахæм фæзуаты, се 'хсæн — уæлдай сæрыстырдзинад чи æвзæрын кæны, ахæм патенттæ. Куыстытæй бирæтæн бæстæйы æмбал нæй. Зæгъæм, мæнæ ацы картофы мыггаг — хуыйны «Ирон», зæгъгæ. Хæххон аграрон университеты бындурыл цы Селекци æмæ тауинæгты центр ис, уым йæ рауадзыныл архайд цыд 12 азы бæрц. Æмтгæй райсгæйæ, ацы мыггаг гектарæй ратдзæн картофы 200 центнеры. Селекционерты æнтыстытæ æмæ гæнæнтæн аргъ скодта республикæйы парламенты сæрдар Тускъаты Таймураз. Хæххон-металлургон институты æмæ Медицинон академийы минæвæрттæ та Тускъаты Таймуразæн радзырдтой, зæххы мидӕг цы æрдзон хъæздыгдзинæдтæ ис, уыдон ссарынæн æмæ зæрдæйы низтæ сбæрæг кæнынæн аразгæ интеллектæй спайда кæнæн куыд ис, уый. Равдыст ацыд «Зонад æмæ зонадон-техникон политикæйы» закъон æххæст кæныны фæлгæты. Æмбырды — ахуырадон уагæтты, куыстуæтты æмæ наукон центрты разамонджытæ. Технологон хæдбардзинад абон у сæйраг нысан. Æнæ æхцайы æххуысæй проектты райрæзт къухы нæ бафтдзæн. Цæгат Ирыстоны хицауад цæттæ у ахуыргæндтæм фæкæсынмæ. Республикон закъоны дæр уыцы æууæл ацы аз фæнысан кодтой. Ныртæккæ Наукон-технологон райрæзты рейтингы республикæ ис 76-æм бынаты. Бæрæггæнæнтæ фæхуыздæр кæныны тыххæй къабазы пълæнттæ æмæ разамындæн хъæуы æххæст системæ саразын.