Балеты базыртыл

Йæ юбилейы фæдыл зæрдиаг арфæтæ райста не `мзæххон, зындгонд балеринæ Адырхаты Светланæ. Кафыд æмæ й` арæхстдзинад æвдыста иу рæстæг Плисецкая æмæ Стручковаимæ, Тимофеева æмæ Максимоваимæ, Бессмертнова æмæ Сорокинаимæ. Йæ курдиатæй дисы `фтыдта адæмы. Галина Уланова та цалдæр хатты фæнысан кодта Адырхаты Светланæйы æвæджиауы тырнындзинад аивады бæрзæндæтм. Уымæн æрбамбæлдысты йæ юбилеймæ йæ бирæ ахуыргæнинæгтæ æмæ йын, йæ кафтмæ кæсын чи уарзта, уыдон. Залы къухбакæнæн нал уыдис уыцы изæр, Адырхаты Светланæйы курдиатыл иузæрдион чи уыдис, уыдонæй. Йæ хæстæджытæ, хæлæрттæ, æмкусджытæ æмæ й` ахуыргæнинæгтæй. Бирæ азты нæ кафаг æмзæххон уыдис Уæрæсейы Стыр театры прима-балеринæ. Ныр йæ зонындзинæдтæ рæдауæй тауы кæстæртыл. Йæ ном хаст у балеты æппæтдунеон энциклопедитæм. Йæ руаджы та нæ бæстæйы егъаудæр æмæ кадджындæр театры сценæ фæхъæздыг вæййы ног курдиатджын артисттæй. «Уыйас тых, уыйас тырнындзинад, ахæм куыстуарзондзинад. Кæддæриддæр мæ дисы `фтыдтой Светланæйы миниуджытæ. Ныр дæр мын у канд разæнгардгæнæн ахуыргæнæг нæ, фæлæ ма фидæныл æууæнчы нысан» — Стыр театры балеты труппæйы разамонæг Уазиты Махарбег УФ-йы сгуыхт артист. Адырхаты Светланæйæн арфæтæ ракæнынмæ Ирыстонæй ацыд нымад делегаци. Битарты Вячеслав, Бибылты Анатолий, Хæдарцаты Махарбег æмæ бирæ `ндæртæ.Республикæйы сæргълæууæг куыд фæнысан кодта, афтæмæй Светланæйы юбилей канд дунеон аивады бæрæгбон нæу. Æгас республикæйæн сси сæрыстырдзинады фæрæз. «Адæймаг æнкъарæнты бын фæвæййы, нæ республикæ дунейæн цы курдиæттæ балæвар кодта, уыдон уынгæйæ. Асæй чысыл стæм, фæлæ нæ номдзыд æмзæххонтæй бирæ егъау адæмтæ æмæ бæстæты нæ фæстæ фæуаддзыстæм. Ныр дæр та йæ уæхæдæг федтат. Цас адæм кад кæнынц Адырхаты Светланæйæн, уымæ ма бакæсут», — Республикæ Цæгат Ирыстон-Аланийы Сæргълæууæг Битарты Вячеслав. Иу æхсызгон хабар ма фехъусын кодта республикæйы сæргълæууæг: Адырхаты Светланæйæн нæ горæты разамынды фæндонмæ гæсгæ лæвæрд æрцыд Дзæуджыхъæуы кадджын гражданины ном. Уæдæ Хуссар Ирыстоны президент Бибылты Анатолий дæр æнæ лæвар нæ сæмбæлд бæрæгбонмæ — юбилярæн саккаг кодта Хæлардзинады орден. Фæлæ æнæдызæрдыккаг у иу хъуыддаг — Адырхаты Светланæ хорзæхты тыххæй нæ фæкуыста уал азы. Сæйрагдæр ын уыдис аивад. Цæрæнбонты уыдис йæ уацары. «Нæ куыст, зæгъгæн дæр ын нæй, афтæ зын у. Æмæ дæ дзы кæд исты ном райсын фæнды, уæд хъуамæ дæхиуыл æнæрынцойæ кусай. Æхсæв-бон нæ хынцгæйæ хъуамæ дæхи уацары радтай ацы аивадæн. Амцъыкк-уымцъыкк зæрдæйы ахастимæ балетмæ цæуæн нæй», — Советон Цæдисы Адæмон Артисткæ Адырхаты Светланæ. Номдзыд балеринæйы юбилейон изæры адæмы къухæмдзæгъдæн бауромæн нал уыдис. Сценæйыл иу иннæйы ивтой, кæддæр Светланæ йæхæдæг цы партитæ кафыд, уыдон. Ныр дæр сæ кафы, æрмæст йæ алæмæты зонындзинæдтæ йæ бирæ ахуыргæнинæгты `вджид кæй бакодта, уый руаджы. Аивадæн йæ лæггæдтæ нæма фесты. Хъулаты Юрий _ Мы рядом в: vk.com/irystontv instagram.com/irystontv youtube.com/irystontv twitter.com/irystontv