Сергей Меняйло фембæлд Михаил Волков æмæ Къозонты Аланимæ

Республикæйы сæргълæууæг Сергей Меняйло фембæлд акционерон æхсæнад «Уæрæсейы посты» генералон директор Михаил Волков æмæ йæ хæдивæг Къозонты Аланимæ. Фембæлды ма архайдтой Цæгат Ирыстоны посты бастдзинады федералон управленийы директор Калоты Олег. Æмбырды архайджытæ дзырдтой Цæгат Ирыстоны посты хызæгты райрæзты фарстатыл. Сергей Меняйло куыд бафиппайдта, афтæмæй республикæйы хицауады уæнгтæ цæттæ стæ уæрæсейаг паддзахадон компаниимæ дарддæр дæр æмгуыст кæнынмæ. Куыд сбæрæг, афтæмæй ныртæккæ посты хайæдтæ ифтонг кæнынц нырыккон домæнтæм гæсгæ. Ахæм хæс сæвæрдта бæстæйы президент Владимир Путин. Уый фæлгæты 2022-æм азы Цæгат Ирыстоны модернизацигонд æрцыд посты 18 хайады. Се 'ппæт дæр сты хъæуты. Михаил Волков куыд загъта, афтæмæй республикæйы 2023-æм азы ма сног кæндзысты ноджы посты 13 хъæуккаг хайады. Æмткæй райсгæйæ республикæйы кусы 162 хайады, уыдонæй 101 сты хъæуты.