Фæсарæйнаг гибрид

Дыгуры районы фермертæ зайын кæнынц французаг нартхор. Фæсарæйнаг мыггаг Ирыстоны боны ахастыл фæцахуыр æмæ зæххыл хорз фæхæцыд. Фæззæджы хъуамæ бæркадджын тыллæг радта. Уæдæ ма районы зæххкусджытæ се `ргом аздæхтой сойæ æмæ картофы куыст кæнынмæ дæр. Разы сты сæ фæллойæ, æви нæ, æмæ сæм паддзахадæй цавæр цæстдард ис, уый базыдта не `сфæлдыстадон къорд дæр. Алы хъæдыл дæр фæйнæ дыууæ нартхоры. Едзеты Аслæнбег æвдисы нартхоры гибридон мыггаг. Хуыйны майсадур. Фермер æй æрбаласта Францийæ цалдæр азы размæ. Йæ ныхæстæм гæсгæ, зайæгой хорз фæхæцыд. Бынæттон климатыл дæр фæцахуыр. Фермерон хæдзарад «Езеев» æрмæст французаг гибридтæ нæ зайын кæны. Ам Æдæппæтæй 120 гектары зæхх бакуыстой. Йе рдæг у Краснодарæй ласт гибрид. Специалистты ныхæстæм гæсгæ, уæрæсейаг мыггаг уæддæр рæстæгæй фæлтæрдгонд у. Стæй цы тыллæг раттынц, уымæй зæрдæ алы хатт дæр барухс вæййы. Дыгуры районы хуымгæндтæ ахсынц 14 æмæ æрдæг мин гектары. Сæ фылдæр хайыл нартхор сагъд ис. Иу гектарæй фермертæ сисинаг сты 8 тоны нартхор. Хъæууон хæдзарады кусджытæ куыд зæгъынц, афтæмæй хъарм уалдзæг уыд æмæ нартхор дæр хорз æрзад. Сæ зæрдæ дарынц, фароны хуызæн хус рæстæг кæй не рлæудзæн, ууыл. Фæззæджы та æнхъæлмæ кæсынц хъæздыг тыллæгмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv