Цæгат Ирыстоны национ музейы байгом равдыст «Товарищество передвижных художественных выставок»

Аивадыл рæстæг дæр нæ тых кæны. Национ музейы байгом равдыст «Товарищество передвижных художественных выставок». Бæлвырддæр нæ дарддæры æрмæджы. Балет, библи, уыимæ цардæй ист нывтæ. Нывгæнæг йæ кæттагыл цы алыхуызон сюжет æмæ историтæ сныв кæны, уыдоны раст цыма цард бауадзы. Ацы куыстытæ æххæст сты 19 æнусы уырыссаг нывгæнджыты дæсныдзинадæй. Ныр уыдоны куыстытæн стыр аргъ кæнгæйæ йæ парахат кæнынц æрыгон нывгæнджытæ. Сæ куыстытæ сын ныр Цæгат Ирыстоны аивадуарзджыты размæ рахастой. Се хсæн æрыгон нывгæнæг Всеволод Саплин. Цы техикæйæ архайы уый у сæрмагондæй йæхи, у зын, фæлæ цымыдисаг, хуыйны «Ловизо». Йæ фæрцы кæттагыл алы сурæт дæр фæзыны 3D-йы хуызы. Уæдæ Пятигорскæй нывгæнæг Ольгæ Биценти та у хæхоон пейзажты дæсны. Цæгат Ирыстонимæ йæ бæттынц хъæрмуд мысинæгтæ. Ирон уидæгтæй уæлдай йæ Ирыстон йæхимæ лвасы æрдзы фидауцæй. Ацы аивадон цæдисы ис бирæ адæмыхæттыты æмæ горæтты минæвæрттæ. Æмгуыст кæнынц куыд иу бинонтау. Аивадон цæдис Санкт Петербурджы фæзынд 2005 азы. Йæ сæйраг хъуыды у уырыссаг аивады хуыздæр традицитæ сног кæнын æмæ сæ рæзтыл бакусын. Равдысты ис куыд бындурон скъолайы, афтæ фæлварæны хуызы нывкæнынады æвдисæнтæ. Фенæн дзы ис алы рæстæджыты техникæтæ дзы куыд баиу сты, уый. Зæгъын хъæуы уый,æмæ уырыссаг реалистон скъолайæн бындур æрæвæдтой зындгонд Крамской, Репин, Шишкин. Ныр æрыгон фæлтæр ног цæстæнгасæй кæсгæйæ сæ аивады æгъдæуттæ дарддæр хæццæ кæнынц. Автортæ сæхæдæг куыд зæгъынц,афтæмæй сæ куыстыты ирдæй æвдыст цæуы сæ цард æмæ аивадон миддуне. Равдыстмæ бакæсæн уыдзæн 2 апрелы онг национ музейы. Аивадуарзджытæн дзы фадат уыдзæн нывгæнджыты уæлмонц сфæлдыстад сæхиуыл банкъарын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv