ЦИПУ йы туризмы факультеты студенттæ зачёт лæвæрдтой ног хуызы

Цæгат Ирыстоны паддзахадон университеты туризмы факультеты студенттæ абон зачет лæвæрдтой ног хуызы. Схуыдтой йæ «Незачёт», зæгъгæ. Билеттæ сахуыр кæныны бæсты сæ хъуыд университеты тыххæй саразын цыбыр видеоæрмæг. Алы къордæн уыд хæслæвæрд: уæлдæр ахуыргæнæндоны 5 хуыздæр бынаты тыххæй радзурын. Амалхъомдзинад, лæггаддзинад æмæ туризмы кафедрæйы разамонæг Туаты Георгийы ныхæстæм гæсгæ, зачеты ног хуыз разынд цымыдисаг æмæ пайда. Уæдæ студентты зæрдæмæ дæр фæцыд, ахæм цыбыр видеоæрмæджытæ аразын сæхи бон кæй у, уый. Уæ зæрдыл уын æрлæууын кæндзыстæм, ацы аз Хетæгкаты Къостайы номыл университет бахастой Иугонд Нациты Æхсæнады æппæдунеон туристон организацимæ. Ахæм хыгъды ис 158 бæстæйы. Ацы организаци архайы, цæмæй туризм фидар, бæрнон æмæ æнцонвадат куыд уа, ууыл. Цæрикъаты Оксанæ, ЦИПУ-йы медиакоммуникациты æмæ мультимедион технологиты кафедрæйы ахуыргæнæг: «Ахуырады мидæг ахсджиагдæр хъуыддагыл нымайын хъæуы уый, æмæ зонындзинæдтæ æдзух хъуамæ уой хъæугæ æмæ пайда. Нæ сæйраг хæс та у, цæмæй студенттæ хъуыды кæныныл ахуыр кæной. Ахæм «Незачёт», зæгъгæ сарæзтам фыццаг курсы студенттæн, æмæ йæ куыд федтам, афтæмæй сæ зæрдæмæ фæцыд. Мæнмæ гæсгæ, ныры студенттæ хъуамæ ахуыр кæной, нырыккон куыстдæттæг цæмæ æнхъæлмæ кæсы, ахæм компетенцитыл». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv