Ибрайым Юсупов - Кеўил кеўилден суў ишер қосығы | Kewil kewilden suw isher - Ibrayım Yusupov qosıǵı

Сөзи: Ибрайым Юсупов Намасы: Нәжимәддин Муҳаммеддинов Қосықларды усы арнадан алсаңыз болады: КЕЎИЛ КЕЎИЛДЕН СУЎ ИШЕР Кийиклер суў ишер сайдан Ғаз - үйрек көлден суў ишер. Ал, адамның кеўли қайдан? Кеўил кеўилдеп суў ишер. Көрдим ақ қуў ойынларын, Үйкелесип мойынларын... Сағынғандай ашық ярын, Кеўил кеўилден суў ишер. Атлар гүлдир - гүлдир киснеп, Шарқ урар үйирин излеп, Қой маңырап, бота бозлап, Кеўил кеўилден суў ишер. Дәрьялар теңизге ашық, Асығар мәўжирип тасып, Жоллар жолларға уласып, Кеўил кеўилден суў ишер. Дослық, иззет - уллы дәўлет, Жан азығы - жақсы сәўбет. Шөлге - бәҳәр, гүлге - нәўбет, Кеўил кеўилден суў ишер. Аспанға сер салып бақсаң, Жулдызлар сөйлесер ақшам. Өзиң булақ болып ақсаң, Кеўил кеўилден суў ишер. Жүрек шәўкилдеп турсын дә! Дүньяның қайсы буршында, Жасап турсақ та, дурысында Кеўил кеўилден суў ишер. Алыстағы асқар таўлар Бири - бирин көрмек болар. Сол ушын да бийик олар, Кеўил кеўилден суў ишер. Серле, ҳәй, инсан баласы! Жамандур кеўил аласы. Адам адамның қуяшы, Кеўил кеўилден суў ишер. ИБРАЙЫМ ЮСУПОВ