Заводы поселочы паддзахадон автоинспекцийы кусджытæ сарæзтой акци

Фæндаджы сæрты хизгæйæ, робот фенæн уыди абон Заводы поселочы 34-æм скъолайы. Паддзахадон автоинспекцийы кусджытæ дзы сарæзтой акци. Фыццагкъласонтæн амыдтой фæндаггон змæлды æдасдзинады домæнтæ. Куыд сæ æххæст кæнын хъæуы, уый тыххæй бæстонæй радзырдтой. Роботы æххуысæй сын бацæттæ кодтой равдыст. Уый фæндаггон фæткы домæнтæ не `ххæст кодта. Ахæм хуызы равдыста фæндаггон фыдбылызы куыд æнцонæй бахауæн ис, уый. Ахæм мадзæлттæ арæзт цæуынц æрвылаз. Фæндаггон инспектортæ куыд зæгъынц, афтæмæй сæ сæйраг нысан - скъоладзаутæн бамбарын кæнын, цæмæй уой къæрцхъусдæр æмæ фæндаггон фæткы домæнтæ æххæст кæной. Мадзалы фæлгæты сывæллæттæ инспектортимæ дзуапп радтой викторинæты фæрстытæн. Базыдтой цы нысан кæнынц светофоры рухсытæ. Уыимæ ма паддзахадон автоинспекцийы кусджытæ ахуырдзаутæн бамбарын кодтой талынджы рухс чи дæтты, ахæм элементтæ æнæмæнг хъæугæ кæй сты. Мадзалы кæронбæттæн сабитæ дзырд радтой фæндаггон фæткы домæнтæ кæй æххæст кæндзысты. Хистæр къласы ахуырдзаутæ та сарæзтой акци «Внимание, юный пешеход», зæгъгæ. Йæ сæйраг нысан хæдтулгæты шофырты зæрдыл æрлæууын кæнын, сабитæ дæр фæндаггон змæлды архайджытæ кæй сты, уый. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv