Эпидемийы ныхмæ

Гуырдзыстоныл тæфсæг бахæцыд. Куыдфæндыдæр бамбарæн ис ацы ныхас. Бæстæйы, H1N1 цы гриппы хуыз хонынц, уый апарахат. Официалон бæрæггæнæнтæм гæсгæ хуыты гриппæй фæмард 18 адæймаджы. Уадзæн пунктты ныртæккæ уæлдай лæмбынæг кæсынц санитарон уавæрмæ. Хæцгæ низы фыццаг миниуджытæ йæхиуыл чи банкъара, уый, æнæмæнг, хъуамæ бацагура дохтырты æххуыс. Куыд ма ис хи бахъахъхъæнæн, уый базондзыстут нæ дарддæры æрмæгæй. 18 адæймаджы уал гриппæй амард, кæд æмæ æрæджы дæр ма 15 йеддæмæ нæ уыдысты, уæд. Ахæм сты официалон бæрæггæнæнтæ. Адæмы `хсæн хъус-хъус ныхæстæм гæсгæ, низы амæттæгтæ сты зынгæ фылдæр. Гуырдзыстоны парахат кæны хуыты грипп кæй хонынц, уыцы рын. Уæлдай цæстдард уыйтыххæй ис уадзæн пункт Уæллаг Ларсмæ. Сæрмагонд службæтæ дзырд дæттынц, вирус, дам, фæсхохæй не `рбауаддзыстæм, зæгъгæ. РЦИ-Аланийы «Роспотребнадзор»-ы управленийы транспортмæ цæстдард Габеты Джульеттæ: «Санитарон пункттæ ифтонггонд сты æмбæлгæ техникон кусæнгæрзтæй. Стыр æххуыс нын сты, тепловизортæ кæй хонынц, уыдон. Адæймагмæ хæстæг цæуын дæр нæ хъæуы, афтæмæй йæ рабæрæг кæнынц, тæвд æм кæй ис, уый. Уымæй уæлдай ма пайда кæнæм гамхудтæ, æрмкъухтæ æмæ æндæр ахæмтæй. Хъомысджын куыст кæнæм дезинфекцион химион фæрæзты руаджы дæр. Адæм бирæгæйттæй кæм æмбырд кæнынц, æнхъæлмæ кæсын сæ дзæвгар рæстæг кæм бахъæуы, уым дæр кусæм. Аразæм профилактикон мадзæлттæ». Техникон фæрæзтæ рынчынты уайтагъд раиртасынц. Кæсынц алы адæймагмæ дæр. Низы миниуджытæ алкæмæн дæр зындгонд сты. Санитарон службæты кусджытæ та ма йæ иу хатт амонынц, фылдæр хъус цæмæ дарын хъæуы, уый. РЦИ-Аланийы «Роспотребнадзор»-ы управленийы транспортмæ цæстдард Габеты Джульеттæ: «Ис ахæм бæрæггæнæнтæ, æмæ сæ фенгæйæ адæймаг хъуамæ фæдызæрдыг уа, рынчын ис йæ цуры æви æнæниз. Фæкæны тæвд, йæ цæссыгтæ фæтæдзынц, хуыфæг ыл бахæцы, йæ риу фæриссы æмæ æндæр ахæм фиппаинæгтæ. Искæуыл куы фæгуырысхæ вæййæм, уæд ын уыцы сахат тагъд æххуысмæ адзурæм». Чыхаг паддзахады цаутæ ма иу хатт зæрдыл æрлæууын кæнынц вакцинацийы тыххæй. Цæгат Ирыстоны цæрджытæй прививкæтæ скодтой сæ 45 процентæй чысыл фылдæр. Ахæм фæрæзæй спайда кæнын хъæуы, куыд гæнæн ис, афтæ раздæр. Уый уымæн, æмæ прививкæйы хъомыс рабæрæг вæййы 2 къуыримæ. Æрæджы гæнæн нæй. РЦИ-Аланийы кусæндæтты `хсæн æмæ æддагон бастдзинæдты медицинон профилактикæйы хайады хицау: «Прививкæтæ кæнын фæхъæуы æнæмæнг. Фылдæр пайда хæссынц, октябры-ноябры сæ куы скæнай, уæд. Дохтырты æххуыс агургæ у цæрæнбынатмæ гæсгæ». Медицинон æххуысæн ахъаз сты хи гигиенæйы мадзæлттæ дæр. Зонгæ сæ алчидæр кæны, уæдæ сæ пайда дæр зындгонд у. Къухтæ арæх æхсын, сыгъдæг уæлдæфæй улæфын, иммунитет фидар кæнын, зæгъæм. Дарын хъæуы гамхуд дæр. Йæ аргъ 5 сомы йеддæмæ нæу. Ахауæнт адæймагæй, ныхас æнæниздзинад æмæ цардыл куы цæуа, уæд. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv