Цæгат Ирыстоны таксистты 80% кусынц æнæ закъонæй

Куыст цы фæнды афон æмæ æнцонæй ссарын кæм ис, ахæм къабæзтæй иу у - такси. Таксисттæй нæ республикæйы цух кæй не 'ййафæм, уый дæр зындгонд хабар у. Афтæмæй та сæ 80% кусынц æнæ лицензийæ. Уый та ма ууыл дзурæг у, æмæ такситы шофыртæ æнæниздзинадмæ, нæ сæ хæдтулгæты уавæрмæ кæй ничи кæсы. Фæлæ уæддæр транспорты ацы хуыз Цæгат Ирыстоны у парахат. Бæлцæтты æдасдзинадмæ та дзы чи кæсы, цымæ? Гæззаты Роберт официалон æгъдауæй кусы афæдзæй фылдæр. Йæ ныхæстæм гæсгæ йæ рагæй фæндыд аууонæй рацæуын, ома, официалон æгъдауæй кусын райдайын. Фæлæ йын цæмæй хорз уыдзæн, уый раздæр нæ зыдта. Стæй ма не 'нхъæлдта, афтæ тагъд йæ гæххæттытæ сæмбырд кæндзæн, уый. Гæззаты Роберт, таксист: «Ныр мæ бон у кредит райсын, кæнæ та исты балхæнын, æмæ йын хайгай фидын. Официалон æгъдауæй кусын. Пенсимæ цæуыны афон мын куы рхæццæ уа, уæд ам цас фæкуыстон, уыцы рæстæг дæр мын банымайдзысты. Пенсион фондмæ фиддонтæ æрвитын куыд æмбæлы, афтæ». Фæлæ афтæ бирæтæ нæ хъуыды кæнынц. Абон, цæмæй закъонмæ гæсгæ маршрутон таксийы шофырæй кусай, уый тыххæй хъæуы регистраци скæнын куыд хицæн амалхъом адæймаг. Уый фæстæ та хъæуы гæххæттытæ транспорты министрадмæ радтын æмæ лицензи райсын. Шофыртæ ууыл æнцонæй не сразы вæййынц. Иутæн таксистæй куыст сæ сæйраг куыст нæу, иннæты нæ фæнды гæххæттытимæ ракæ-бакæ кæнын, стæй сæм фиддонтæ æгæр стыр кæсынц. Официалон æгъдауæй куы кусой, уæд сæ хъæуы хъалонтæ фидын. Такситы фирмæты хицæуттæ уыцы хæрдзты хай исынц сæхимæ. Кортиаты Алан, таксийы фирмæйы хицау: «Нæхæдæг сын баххуыс кæнæм сæ гæххæттытæ сцæттæ кæнынмæ. Сæ лицензийæн сын нæхæдæг бафидæм. Уый руаджы сæ аууоны кусынæй официалон куыстмæ здахæм. Махæн дæр нæхицæн уый ахсджиаг у. Уымæй уæлдай ма тарифтæ шофыртæн фæкъаддæр кæнæм». Специалистты ныхæстæм гæсгæ, уавæр аивынæн хъæуы хи пайдайæн кусыны закъон сфидар кæнын. Уый фирмæты хицæуттæн дæтты бар сæ кусджыты бæсты фиддонтæ æмæ хъалонтæ фидынæн, уыимæ бухгалтерон куыст кæнын. Уый руаджы шофыртæ суæгъд уыдзысты гæххæттытимæ куыстæй. Уыимæ фирмæтæ уромдзысты квартАлмæ 6% алы шофыры æфтиæгтæй. Кортиаты Алан, таксийы фирмæйы хицау: «Мæнмæ гæсгæ, закъоны бындурыл кусын райдайдзысты таксистты 40-50%. Æмæ уый фыццаг рæстæг. Уыдонæн хъалон у 4-6%. Иннæ регионты фæлтæрддзинад куыд æвдисы, афтæмæй хи пайдайæн кусыны закъон кæм ис, уым фылдæр таксисттæ кусынц официалон æгъдауæй». Нæ республикæйы промышленность æмæ транспорты министрады куыд æмбарын кæнынц, афтæмæй таксистты 80% кусынц æнæ закъонæй. Абоны онг министрады реестры регистрацигонд сты такситы 30 фирмæйы бæрц. Лицензитæ та радтой 300-мæ ввахс. Уагдоны куыд зæгъынц, афтæмæй ацы къабазмæ æнæмæнг хъæуы цæст дарын, фæлæ уый у зын. Хайдарбек Бутов, РЦИ-Аланийы промышленность æмæ транспорты министр: «Семæ тох кæнын у тынг зын. Уымæн æмæ 294-æм закъонмæ гæсгæ, ацы куысты хуызмæ цæст дарыныл æвæрд ис мораторий. Ацы куыстмæ цæст дарын не мбæлд 17-æм, 18-æм азты, афтæ уыдзæн 19-æмы, стæй 2020-æм азы кæронмæ дæр». Цæмæй таксистæй кусын райдайай, уый тыххæй сæрмагонд ахуырад æмæ бастдзинæдтæ нæ хъæуы. Хъуамæ дæм уа хæдтулгæ тæрыны бартæ. Таксисттæ сæхæдæг дæр фæзæгъынц, фирмæмæ кусынмæ цæугæйæ сæ нæ сæ дæсныйадæй бафæрсынц, нæ се нæниздзинады уавæрæй. Хъæуы ма сæ æрмæст дæр раци æмæ смартфон. Ацы къабаз аууонæй ракæнын хуыздæрырдæм фæзындзæн бæлццонты æдасдзинадыл. Официалон æгъдауæй кусæг таксисттæн æнæмæнг рейсыты размæ сæ хæдтулгæйы уавæрмæ æркæсынц, сæхицæн та - се 'нæниздзинадмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv