Украинæйы, Донецк æмæ Луганскы адæмон республикæты, стæй Херсоны æмæ Запорожьейы облæстты чи фæмард, сæрмагонд æфсæддон операцийы уыцы архайджыты æппæт бинойнæгты дæр цæрæнуæттæй сифтонг кæнын. Бæлвырддæр та, æххуысы сæрмагонд мадзæлттимæ паддзахадон программæ саразын. Республикæйы Парламент премьер-министр Михаил Мишустинмæ цы сидтимæ баздæхт, уымæ депутаттæ æркастысты Парламенты советы æмбырды. Амыдта йæ Парламенты сæрдары фыццаг хæдивæг Тхостаты Мурат. Парламенты уæнгтæ уынаффæйы проектимæ сразы сты. Хорзыл банымадтой Ярославлы облæсты думæйæ Уæрæсейы хицауадмæ цы курдиатимæ баздæхтысты, уый дæр. Ныхас дзы цæуы инвалид-сывæллæттæн санаторон-курортон дзæбæхгæнæндæттæм балцæгтæ дæттыныл. Бирæсывæллонджын бинонты сывæллæтты уæлдæр ахуырадон уагдæтты бакалавриат æмæ специалитеты программæтæм гæсгæ ахуыр кæнынæн фылдæр гæнæнтæ раттын. Федералон закъоны проектимæ депутаттæ сразы сты. Парламенты уæнгты хъуыдымæ гæсгæ, хъæуы мадзæлтты æххæст системæ, бирæсывæллонджын бинонты сывæллæттæн хорз ахуырад райсын æмæ дарддæр куыст ссарынæн æххуыс чи уа, ахæм.