Советон Цæдисы спорты дæсны Людмила Щербич абон бæрæг кæны йæ 70 азы юбилей. Фехтованийæ зындгонд тренерæн раарфæ кодта Республикæйы закъонæвæрæг оргæны разамонæг Тускъаты Таймураз. Радта йын Цæгат Ирыстоны Парламенты Кадджын грамотæ, фæнысан кодта, республикæйы физкультурæ æмæ спорты райрæзтмæ цы стыр æвæрæн бахаста, уый. Людмила Щербич цы дæсныйад равзæрста, ууыл æнувыд у ныр 50 азы дæргъы. Хорзæхгонд у «Ирыстоны намысæн» майданæй. Йæ хъомылгæнинæгтæ сты дунейы дыууæ хатты чемпионкæ фехтованийæ, Европæйы чемпионкæ, Советон Цæдис æмæ Уæрæсейы бирæхаттон чемпионкæ, Европæйы Кубокы хицау Ольга Величко, стæй дунейы æмæ Европæйы чемпионатты цалдæр хатты призер, æппæтдунеон къласы спорты дæсны Сиукъаты Жаннæ. Тренеры иннæ хъомылгæнинæгты 'хсæн ис Советон Цæдис æмæ Уæрæсейы 8 спорты дæсныйы, уæрæсейаг æмæ æппæтдунеон ерысты уæлахиздзаутæ æмæ призертæ.