Мемориалон комплекс «Журавли» нымад æрцыд культурон нысаны объектыл

Цæгат Ирыстоны мемориалон комплекс «Журавли» нымад æрцыд культурон нысаниуæг кæмæн ис, ахæм объектыл. Уый тыххæй фехъусын кодта нæ республикæйы культурон объекттæ хъахъхъæныны æмæ пайда кæныны комитеты разамонæджы хæдивæг Чехойты Людмилæ. Йæ ныхæстæм гæсгæ, ахæм уынаффæ рахастой комитеты радон æмбырды. Уæ зæрдыл уын æрлæууын кæндзыстæм, Гæздæнты 7 æфсымæрæн цы цыртдзæвæн ис, уый æвæрд æрцыд 1973 азы. Федералон закъонмæ гæсгæ, культурон нысаниуæг ис раттæн ахæм объектæн, йæ равзæрды фæстæ 40 азы кæмæн рацыд æмæ историон иртæстыты хатдзæгтæм гæсгæ ахæм номы аккаг чи разыны, ахæмтæн. Мемориалон комплекс раздæр  номхыгъдмæ хаст кæй нæ уыд, уый тыххæй дзы цалцæггæнæн куыстытæ официалон æгъдаумæ гæсгæ нæ цыдысты. Фæлæ уæддæр, бынæттон хицауад алкæдæр зылд йæ æддаг бакаст æмæ уындмæ. Историон иртæстыты хатдзæгтæм гæсгæ снысан кæндзысты æмбæлгæ куыстытæ. Хъуамæ æххæстгонд æрцæуой Уæлахизы 75 азы юбилейы агъоммæ. Цæгат Ирыстонæй фашисттимæ тохмæ ацыд 95 мин адæймаджы. Се ’рдæг сæ фыдыуæзгыл нал сæмбæлд. Хæдзарæй-иу   фондз, æхсæз, авд фырты арвыстой. Гæздæнты 7 æфсымæры сæ хæстон фæндæгтæ акодтой Уæрæсейы алы бæстæтæм. Адæмы сæраппонд сæ цард нæ бавгъау кодтой. Сæ нæмттæ æнусты цæргæйæ баззадысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv