Цæгат Ирыстон бахауд æппæты къаддæр ипотекæ кæм исынц, уыцы регионты номхыгъдмæ

Цæгат Ирыстон бахауд æппæты къаддæр ипотекæ кæм исынц, уыцы регионты номхыгъдмæ. Æмткæй райсгæйæ Цæгат Кавказ дæр уыцы бæрæггæнæнмæ гæсгæ Уæрæсейы ахсы фæстаг бынæттæй иу. Ипотекон кредиттæ фæстаг 12 мæймæ 1 мин кусæнхъом адæмы ‘хсæн æппæты къаддæр исынц Мæхъæлы. Ам уыцы бæрæггæнæн у 0,8 %. Уæрæсейы æппæт регионты ‘хсæн рæстæмбис бæрæггæнæн у 18,4%. Цæгат Кавказы федералон зылды иннæ регионты дæр уавæр уæлдай æндæрхуызон нæу. Цæцæны - 1,4%; Дагестаны - 3%, Кæсæг-Балхъары - 6,7%; Цæгат Ирыстоны - 8,7%; Хъæрæсе-Черкесийы та - 8,8%. Стъараполы ипотекæтæ исынц чысыл фылдæр. Уым коэффициент у 14,2%. Регион ахсы рейтинджы 14-æм бынат. Фыццаг бынат рейтинджы ахсы Ямалаг-Ненецаг автономон зылд. Уыцы бæрæггæнæн дзы хæццæ кæны 31,7% онг. Уыимæ ма, Цæгат Ирыстон бахауд ипотекон кредиттæм гæсгæ æвзæр чи фиды, уыцы регионты номхыгъдмæ дæр. Ахæм уавæры сты æгас Уæрæсейы дæр, фæлæ уæлдай ахсджиаг у 44 субъекты. Дзыллонинформацион фæрæзтæ куыд кæнынц, афтæмæй æвзæр чи фиды, уыдоны бæрц астæуккаг æмвæзæй - ома 1,04%-æй - ахызт 25 регионы. Уыдоны ‘хсæн разынд нæ республикæ дæр 2,57% бæрæггæнæнимæ. Цæмæй йæ иннæ регионтимæ абарат, уый тыххæй уын хæссæм ацы статистикæ. Ипотекæйæн æвзæр чи фиды, ахæмты бæрц республикæ Алтайы у 3,43%. Хъæрæсе-Черкесийы - 2,58%, Бурятийы - 2,12%. Экспертты хъуыдымæ гæсгæ, уыцы регионты æнæмæнг хъæугæ уыдзæн ипотекæ фидынæй баулæфыны рæстæг. Ипотекæ фидынæй баулæфыны тыххæй закъон йæ тыхы бацыд 31-æм июлы. Уымæ гæсгæ, зын уавæры чи бахауд, уыдонæн ипотекæйы хæс фидынæй баулæфæн ис 6 мæйы. Уыимæ ахæм барæй кредиты рæстæгмæ спайда кæнæн ис æрмæст дæр иу хатт. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv