Дзæуджыхъæуы электроникæйы колледжы гранты фæрæзтæй аразынц 4 кусæнуаты

Дзæуджыхъæуы электроникæйы колледжы архайынц, йе `нæниздзинад хъыгдард кæмæн у, уыцы студенттæн æппæт хъæугæ уавæртæ дæр саразыныл. Хæрзæрæджы колледж рамбылдта грант. Йæ фæрæзтæй йын хъуамæ саразой цалдæр кусæнуаты. Дзуапп дæтдзысты æппæт нырыккон домæнтæн дæр. Сæ сæйраг хæс у, фæсивæдæн ахуыры фæндагыл сæ къуылымпытæ ауиварс кæнын. Ацы кабинеты ныртæккæ цæуынц цалцæггæнæн куыстытæ. Раивдзысты дзы рудзгуытæ, сæвæрдзысты дзы пъолты ног уæлцъар. Куыстытæ æххæст кæнынц колледжæн йæхи фæрæзтæй. Стæй йæм уыйфæстæ баласдзысты нырыккон техникæ æмæ кусæнгæрзтæ. Уыдон балхæндзысты гранты фæрæзтæй. Ахуыргæнæндоны архайынц æппæт уавæртæ дæр саразыныл, цæмæй, йе `нæниздзинад хъыгдард кæмæн у, уыцы студенттæ æнæ къуылымпытæй сæ дæсныйадмæ гæсгæ сæ зонындзинæдтæ уæрæхдæр кæной. «Уæрæсейы ахуырады министрады конкурсы рамбылдтам грант. Фыццаг хатт нын нæу. Фæлæ ахæм егъау грант фыццаг хатт нæ къухы бафтыд. Æдæппæтæй 9,5 милуан сомы. Уыцы фæрæзтæ бахардз кæндзыстæм инклюзивон ахуыра ддыл. Йе `нæниздзинад хъыгдард кæмæн у, уыцы студенттæн сифтонг кæндзыстæм 4 кусæнуаты. Ныр уал сæ цæттæ кæнæм. Алцыдæр дзы баивдзыстæм, суанг рухсдæттæг системæйы онг. Фæстæдæр та дзы фæзындзæн, æмбал кæмæн нæй, ахæм кусæнгæрзтæ. Хъусæй æвзæр чи хъусы, йе стджытæ хъыгдард кæмæн сты, уыдонæн дзы уыдзæнис сæрмагонд техникæ. Ахæм фæсивæдимæ рагæй кусæм. Ам сараздзыстæм лаборатори, компьютерон системæты, стæй радио æмæ электрон техникæйы дæсныйæдтыл чи ахуыр кæны, уыдонæн. Сæвæрдзыстæм дзы æппæты нырыккондæр техникæ», - Дзæуджыхъæуы электроникæйы колледжы директор Дзугкойты Руслан. Гранты фæрæзтæй ма колледжы сифтонг кæндзысты дыууæ компьютерон кабинеты. Æдæппæтæй дзы уыдзæнис 30 компьютеры. Уымæй уæлдай дзы дæрддзæгмæ ахуырадæн сараздзысты æмбæлгæ уавæртæ. «Йе `нæниздзинады уавæрмæ гæсгæ колледжмæ цæуын цы студентты бон нæ уа, уыдоны сифтонг кæндзыстæм компьютертæ æмæ планшеттæй. Ам та компьютерон кусæнуæттæ уыдзысты. Информацион системæтæ æмæ программæтæ фыссыныл, стæй дизайны дæсныйадыл чи ахуыр кæны, уыдонæн. Стæй ма, фыццаг уæладзыджы сараздзыстæм информацион интерактивон фæйнæг. Йе `нæниздзинад хъыгдард кæмæн у, уыцы студентты бон дзы уыдзæн сæ ахуыры фæтк фенын, стæй дзы цы ивддзинæдтæ уыдзæн, уыдон дæр. Цæмæй сын æнцондæр уа, уый тыххæй сын радих кæндзыстæм уæладзыджы иу хай», - Дзæуджыхъæуы электроникæйы колледжы директоры хæдивæг Сланты Иринæ. Æдæппæтæй колледжы ахуыр кæнынц 5 дæсныйадыл: радио æмæ электрон техникæ цалцæггæнджытæ, транспорты радио æмæ электрон кусæнгæрзты специалист, программæтæ фыссыны æмæ информацион системæты, стæй компьютерон системæтæ æмæ дизайны дæсныты. Æппæт дæсныйæдтæ дæр сты ахсджиаг æмæ хъæугæ ныры рæстæджы. Уæлдайдæр, йе `нæниздзинад хъыгдард кæмæн у, уыдонæн. Йе `нæниздзинад хъуыгдард кæмæн у, уыцы фæсивæдæн колледжы æмбæлгæ уавæртæ аразын райдыдтой 2014-æм азы. Уæд дзы гранты фæрæзтæй сарæзтой пандустæ, фæзынд сæм хæдтулгæтæ æвæрæн ран. Октябрьмæ ма дзы хъуамæ фæзына 4 ифтонггонд кусæнуаты. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv