Рæсугъд традици

Дзæуджыхъæуы цæрджытæ Ног азы бæрæгбонмæ сæхи бæстонæй бацæттæ кодтой. Хæдзæртты кæртытæ саив кодтой алыхуызон хъазæнтæй æмæ цырæгътæй. Дзæуджыхъæуы администраци ма сын суанг конкурс дæр сарæзта. Æркасты уыд 3 номинацийы. Хуыздæрты сбæрæг кодтой коммерцион уагдæтты, бирæуæладзыгон æмæ хи хæдзæртты хсæн. Чи фæуæлахиз, уый сбæрæг кодта нæ уацхæссæг. Дзæуджыхъæуы Тургеневы номыл уынджы Ног Азы бæрæгбоны агъоммæ цæхæртæ скалдта. Цæрджытæ йæ алы сурæттæй æмæ цырæгътæй срæсугъд кодтой. Касаты Руслан йæхи хъаруйæ саив кодта сæ уынг. Йæ сыхæгтæ дæр æм фæкастысты,сæ бон цæмæй уыд ,уымæй. Руслан куыд зæгъы, афтæмæй йæ тынг фæндыд адæмæн Ног Азы бæрæгбонмæ циндзинад балæвар кæнын. Цæмæй адæмы зæрдæтæ райгонд уой. Æмæ уыцы хъуыддаг йæ къухы бафтыд Тургеневскæйы уынг банымæдтой æппæты рæсугъддæр æмæ аивдæр сыхыл. Æцæг Ног азы аргъау сæ кæртыты сарæзтой бирæфатерон хæдзæртты цæрджытæ дæр. Уæлдай цымыдисаг сæ æй саив кодтой Ларионовы номыл уынджы хæдзары цæрджытæ. Сыхæгтæ сæ кæрт барæсугъд кодтой иумæйаг тыхтæй. Сæ кæрты аивдзинад сын банымадтой хуыздæрыл горæты бирæфатерон хæдзæртты 'хсæн. Коммерцион уагдæтты 'хсæн та хуыздæрыл банымадтой чырæ телефонтæ уæйгæнæн дукани. Мæрзойты Руслан, Дзæуджыхъæуы администрацийы культурæйы разамынды сæрдар: «Конкурсы хатдзæгтæ скодтам. Уæлахиздзауты та сбæрæг кодтам бæрæгбæтты фæстæ. Адæм бацархайдтой, саив кодтой сæ хæдзæрттæ, кæртытæ, сæ кусæн бынæттæ. Тынг æхсызгон нын у, адæм бæрæгбонмæ сæхи бæстонæй кæй бацæттæ кæнынц,уый . Уæлдай æхсызгон та нын у, æмæ нæ горæты æппæт цæрджытæ уыцы рæсугъддзинадыл кæй цин кæнынц ,уый». Конкурсы уæлахиздзауты схорзæхджын кодтой дипломтæ æмæ æхцайы премитæй. Мадзал аразджыты ныхæстæм гæсгæ, йæ архайджыты нымæц азæй-азмæ фылдæр кæны. Уынгтæ æмæ кæртыты та аивдæр æмæ рæсугъддæр. Горæты администрацийы куыд зæгъынц, афтæмæй Ног азмæ хæдзæрттæ, кæртытæ æмæ уынгтæ аив кæнын сси бæрæгбоны традици. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv