Хуссар Ирыстоны университеты журналистикæйы факультеты студенттæ сты практикæйы

Хуссар Ирыстоны паддзахадон университеты студенттæн райдыдта практикæ. Фыццаджыдæр уал базонгæ сты журналисттæ, монтажертæ æмæ режиссерты куыстимæ. Студенттæн бæстонæй радзырдтой эфирмæ æрмæг цæттæ кæныны фæткы тыххæй. Æрвылбон дæр сын уыцы иухуызон у. Æрмæджытæ цæттæ кæнынц куыд ирон, афтæ уырыссаг æвзагыл дæр. Практиканттæн æххуыс кæны университеты лектор Гана Яновская. Бирæ азты телеуынынады куысты журналистæй. Гана Яновская, Хуссар Ирыстоны паддзахадон университеты лектор: «Телеуынынад куыд кусы, нæ уацхæсджытæ се `рмæджытæ куыд цæттæ кæнынц, уый фенынмæ æрбацыдысты ардæм. Бирæтæ дзы нырмæ студенттæ сты. Мах дæр ныртæккæ камерæмæ исынц, æмæ дзы цавæр æрмæг рауайдзæн, монтажы фæстæ дзы цы рауайдзæн, уый изæры фендзыстут». Практикæ у ахуырадон ахсджиагдæр хæйттæй иу. Лекцитæ æмæ семинарты рæстæг цы зонындзинæдтæ райсой, уыдоны практикон ахуыртимæ абарæн нæй. Гана Яновская, Хуссар Ирыстоны паддзахадон университеты лектор: «Журналистæн æппæты сæйрагдæр у уæндондæр уæвын. Цыдæриддæр уæм фÆрстЫтæ ис, уыдон дзургæ хъуамæ кæнат. Æнæхъæн телеуынынады куыст дæр уæ бон фенын у. Нæ сусæгдзинæдтимæ уæ базонгæ кæндзыстæм. Уæ бон уацхæссæгимæ æрмæг исынмæ ацæуын дæр бауыдзæн». Практиканттæ сфæлдыстадон куысты лыстæгдзинæдтæм лæмбынæгæй кæсынц. Журналисттæ æмæ техникон службæйы кусджыты ныхæстæ æмæ фæдзæхстытæ æппынæдзух сæ зæрдыл дарынц. Практикæйы фыццаг бон студенттæ телеуынынады кусджытæм лæвæрдтой бирæ алыхуызон фÆрстЫтæ. Алчидæр дзы бæстон дзуапп райста. Университеты аудиториты бæсты - телеуынынады кабинеттæ. Студенттæ зæрдиагæй сæхи бафæлвæрдтой ног уавæрты. Цалдæрæй ма суанг журналистты æххуысæй бавзæрстой сюжет эфирмæ бацæттæ кæныныл дæр. Гобозты Сюзаннæ, университеты студенткæ: «Абон дæр нын тынг бирæ цымыдисаг хъуыддæгтæ равдыстой. Адæм куыд кусынц, уый. Нæ зæрдæмæ тынг фæцыдис. Нæ зæрдæ дарæм, ам бакусын нæ къухы кæй бафтдзæн, ууыл». Студенттæ сæ фидæны дæсныйадимæ зонгæ кæнгæйæ тынг сразæнгард сты. Сæ зондамонджытæн зæрдæ бавæрдтой, тынг зæрдæрайгæйæ алы бон дæр практикæмæ кæй цæудзысты, уымæй. Хъуылымбегты Виктория, университеты студенткæ: «Журналистты дæсныйад мæхæдæг барвæндонæй равзæрстон. Тынг æнувыд ыл дæн. Нæ сæрдыгон сессийы фæстæ нæм райдыдта практикæ. Куысты лыстæг хабæрттæ нын равдыстой. Хорз специалисттæ нæ цæмæй рауайæ, ууыл архайдзыстæм». Студенттæ сæхи бафæлвæрдтой æцæг уацхæсджыты бынаты дæр. Ныффыстой сæ хъæлæстæ, æрмæг монтаж кæнынмæ дæр ма бавнæлдтой. Ахæм уавæрты сæ практикæ ахæсдзæн дыууæ къуырийы. Уыцы рæстæгмæ сæхи ахуыр кæндзысты сæ фидæны дæсныйады сусæгдзинæдтыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv