Рахизфарсы районы поликлиникæйы азы дæргъы пайда кæнынц электрон талонты системæйæ

Рахизфарсы районы поликлиникæйы ныр афæдзы дæргъы кусы ног электрон талонты системæ. Кæд раздæр талон райсæн уыд æрмæст регистратурæйæ, уæд ныр инфоматы руаджы пациентты бон у талон бæлырд рæстæгмæ райсын. Куыд кусы ног системæ æмæ адæмы раздæрау рады лæууын бахъæуы дохтырмæ, æви нæ? Уый базонынмæ не`сфæлдыстадон къорд бабæрæг кодта дзæбæхгæнæндон æмæ аныхас кодта паиценттимæ, стæй дохтыртимæ дæр. Æрвылбон Рахизфарсы районы поликлиникæмæ цæуынц бирæ пациенттæ.Се 'хсæн алы кары адæм. Раздæр цæмæй дохтырмæ бахауай, уый тыххæй иу рагацау æрбацæуын хъуыди. Рады фæлæууын, сахат, кæнæ хатгай фылдæр дæр. Уый та, йе 'нæниздзинад кæмæн фæцудыдта, уыдонæн æнцон нæ уыд. Ныр инфоматы фæзындимæ дохтырмæ бахауын фенцондæр. Адæймаг поликлиникæмæ æрбахизгæйæ медицинон кусæджы æххуысæй райсы электрон талон бæлвырд рæстæгмæ. Инфомат поликлиникæйы лæууы афæдзы дæргъы. Ногдзинад адæмæн удæнцой у æви хъуыддаг нæ аивта, æмæ раздæрау рады лæууын хъæуы, уый бæлвырдæй базонынæн аныхас кодтам поликлиникæйы пациенттимæ. Сæ фылдæр куыд зæгъынц, афтæмæй инфоматы фæзындимæ хъуыддаг фæхуыздæр. Ног электрон талонты системæимæ къуылымпытæ дæр фæзыны. Алкæд адæймаг, цы рæстæгмæ райсы талон, уыцы афон йæ бон бахауын нæ вæййы дохтырмæ. Уæлдайдæр та райсомы 8 сахатæй 10 сахаты онг. Пациентты æнхъæлмæ кæсын кæй бахъæуы дохтырмæ бахауыны агъоммæ, уымæн ис цалдæр аххосæджы. Фыццаджыдæр, бирæ адæм ног системæйыл нæма сахуыр сты. Ома, æнæ талонæй дохтырмæ цæуæн кæй нæй, ууыл. Уыимæ ма, бирæтæ, цы рæстæгмæ хъуамæ æрбацæуой дохтырмæ, уымæй дзæвгар фæстæдæр æрбацæуынц. Уый расайы стыр радмæ. Уæлдайдæр, невролог, хирург æмæ окулистмæ. «Сæхи дзæбæх кæнынмæ нæм цæуынц канд Беслæн нæ, фæлæ хъæуты цæрджытæ дæр. Бирæтæн сын рагацау æрбацæуын æмæ талон райсыны фадат нæ вæййы. Уагæвæрдмæ гæсгæ иу пациентæн фаг у 15 минуты. Архайæм, цæмæй уыцы рæстæгмæ алы адæймагмæ дæр лæмбынæг æркæсæм. Фæлæ, нын алы хатт нæ рауайы. Уæд ма сæ иннæ бон дæр æрбацæуын кæнæм», - Рахизфарсы районы поликлиникæйы цæстыты дохтыр Æмбалты Верæ. Ног системæ ма къуылымпытыл æмбæлы, æппæт дохтырты кабинетты компьютертæ кæй нæй, уымæй дæр. Уымæн æмæ иуæй-иу хатт инфомат талон раст рæстæгмæ нæ ратты. Компьютерыл та йæ дохтыр фены, æмæ регистратурæмæ фехъусын кæны, æндæр рæстæгмæ кæй раттын хъæуы талон, уый. «Поликлиникæйы дохтыртæм бахауæн ис, куыд инфоматæй талон райсгæйæ, афтæ телефонæй æрбадзургæйæ дæр. Стæй регистратурæйæ дæр райсæн ис талон. Инфомат раст рæстæгмæ куы нæ ратты талон, уæд техникон æххуысы службæмæ фехъусын кæнæм, æмæ хъæндзинад аиуварс кæнынц. Бирæ адæм инфоматыл ахуыр нæма сты. Куыд пайда кæнгæ дзы у, уый дæр нæ зонынц. Зынæй дзы ницы ис. Æрмæст сæм хъуамæ паспорт, полис æмæ снилс семæ уой», - Рахизфарсы районы поликлиникæйы разамонæг Гутъиаты Аленæ. Хæстæгдæр рæстæг поликлиникæйы фæзындзæн дыккаг инфомат. Куыд дзы пайда кæнын хъæуы, ууыл ахуыр кæндзысты пациентты. Уыимæ ма, 2020 азы æппæт дохтырты дæр сифтонг кæндзысты компьютертæй. Афтæмæй ног электрон системæ кусдзæн къадддæр къуылымпытимæ. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv