Камерæ цæттæ

Абон æгас дунейы дæр бæрæг кæнынц Кинойы бон. Махæй дæр бæрæгбон нæ ферох. Бацæттæ кодтам сæрмагонд æрмæг ирон кинематографы тыххæй. Кæддæр йæ кой айхъуыст æгас Советон Цæдисыл. Цæмæй райдыдта ирон кинематографы истори æмæ йæ раздæры кад раздахæн ис, æви нæй? 1965-æм аз баззад ирон кинематографы историйы. Киноуарзджытæ, сæ сæргъы Дзанайты Азанбег, афтæмæй истой киноныв «Осетинская легенда», зæгъгæ. Ацы цау нымад у ирон кинематографы райгуырдыл. Уæд киноныв бирæты зæрдæмæ фæцыд. Цалдæр азы фæстæ Цæгат Ирыстоны фæзынд телеуынынадон кинонывты студи. Уым 1967-æм азы ист æрцыд дыккаг киноныв. Уый дæр æнтыстджын рауад. «Возвращение Коста», зæгъгæ рамбылдта Æппæтцæдисон кинофестивалы. Уымæй сæйрагæр кинонывты æркаст та Советон Цæдисы нæ уыд. 60-æм азты республикæйы скуыстой Цæгат Кавказы кинохроникæйы æмæ центрон телеуынынадæн кинонывтæ исыны студитæ. Уæд кинонывтæ дæр æндæрхуызон истой. Сфæлдстадон къорды иу уыд 25 адæймаджы. Аппаратурæ уыд тынг стыр. Цæмæй йæ бынатмæ æрбаласай, уый тыххæй иу хъуыд уæзласæн хæдтулгæтæ. Семæ ма иу ракодтой ласæн кæмæн уыд, ахæм электрон станцæ дæр. Кинонывтæ истой пленкæмæ. Уыимæ та хъуыд уæлдай арæхстджынæй архайын. «Куысты алы къæпхæнты дæр тынг вазыгджын уыд, пленкæимæ куыд архайынц, уый. Зæгъæм, йæ бакусыны рæстæг температурæ раст ку нæ скодтаис, уæд иу пленкæ фесæфт. Уæдæ цъæрæмæхстытæ кæй кодта, уый тыххæй нал дзурын. Уæд иу хæрзхъæд куыстыл нымад нал уыд. Киноныв иу бахъуыд ногæй исын. Видеойæн та цы хъæуы?! Систай йæ æмæ цæттæ у», — кинорежиссер, паддзахадон телерадиокомпани «Алания»-йы кино æмæ видео уадзæг къорды сæргълæууæг Рафаэль Гаспарянц. Азмæ иу Цæгат Ирыстоны систой 2 аивадон æмæ 18-мæ хæстæг документалон кинонывтæ. Фæлæ перестройкæйы рæстæг кинонывты кондад æрлæууыд. Цæгат Кавказы кинохроникæйы студи нал куыста. Ныр дæр ма æхгæд у, кæд æмæ Владимир Путин бафыста йæ байгом кæныны тыххæй бадзырд. Ныр ын хъуамæ радтаиккой æндæр ном: аивадон, документалон æмæ аниамцион кинонывты Цæгат Кавказаг киностуди. Специалистты ныхæстæм гæсгæ, куы байгом уа, уæд ирон кинематограф дæ ногæй райгуырдзæн. Фæлæ афтæ зæгъæн дæр нæй, æмæ нæ республикæйы æппындæр ничи исы кинонывтæ. «Уый уыдис, ис æмæ уыдзæн. стæй ма рæзгæ дæр кæндзæн. Кинонывтæ нæм ма исой, - афтæ нæм никуы уыд. Стæй Дзæуджыхъæуы раздæрау у Цæгат Кавказы кинематографион сæйраг горæт. Нæ фæсивæд дæр æнцад нæ лæууынц. Уыдон дæр нырыккон кинонывтæ исыны сæхи фæлварынц», — кинорежиссер Туаты Теминæ. Киноисынад æцæгæй дæр æнцад нæ лæууы. Рæзы æмæ ивы. Нырыккон кинорежиссертæ кинонывтæ исынц сæхи тыхтæй. Уыимæ сæ хъус дарынц, киноуарзджыты фæндонмæ. Сæйрагдæр у коммерцион æгъдауæй æнтыстджын проект саразын. «Продæсертæ, кинорежиссертæ хъуамæ сеппæт дæр бамбарой, киноныв сисын фыццаджыдæр бизнес кæй у. Куыддæр бамбарæм уыцы куыст амалхъомдзинад у, уый, уæд нын фæзындзæн рæстæг, сфæлдыстадыл дæр бакусын. Киноуарджыты та хъуамæ режиссер нæ, фæлæ æхсæнад хъомыл кæна», — «CОMEDY»-ы продюсер Бадзиты Таймураз. Ирон кинематографы минæвæрттæ кусынц алы хуызон. Фæлæ сæ иу кæны, се ппæты дæр национ киноисынадрæзын кæнын кæй фæнды, уый. Биджелты Бертæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv