12-аздзыд Хынцæгты Хетæг сси курдиатджын сывæллæтты конкурс «Синяя птица»-йы уæлахиздзау

Дзæуджыхъæуккаг 12-аздзыд Хынцæгты Хетæг сси курдиатджын сывæллæтты Æппæтуæрæсеон конкурс «Синяя птица»-йы уæлахиздзау. Федералон эфиры Хетæг уый размæ бакаст зындгонд æфсæддон разамонæг, Советон Цæдисы дыууæ хатты хъæбатыр, легендарон Плиты Иссæйы тыххæй монолог. Кæронбæттæн къæпхæны та сæ хæслæвæрд уыд, нæ бæстæйы президенты ролы ныстуанимæ раныхас кæнын. Æрыгон Хетæгæн уый бантыст. Лæппу рагæй бæллыд ацы стыр сценæмæ бахауын. Жюрийы уæнгтæ йын скодтой стыр аргъ. Æвзонг курдиат сæ дисы бафтыдта йæ зæрдæмæхъаргæ дзырдæй. Йæ аив ныхасæй цæссыджытæ æруагъта суанг Уæрæсейы зындгонд амонæг Владимир Соловьев дæр. Уымæй уæлдай, куыд уазæг афтæ, æвзонг курдиæтты æппæтуæрæсеон æргом телевизион конкурсы азарыд зарæггæнæг Сланты Тимур дæр. Бафтаудзыстæм ма уый æмæ Хынцæгты Хетæг архайы алуыхуызон проектты Ирыстоны национ телеуынынады, хъазы цыргъзонд æмæ æрхъуыдыджынты клубы, æмхиц у спортмæ æмæ фыссы æмдзæвгæтæ. Йе стырдæр бæллиц та у ГИТИСы режиссерыл сахуыр кæнын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv