Цъæх дон

Сæ ныхæстæм гæсгæ, спъиртуадзæн заводтæ сæ хауæццæгтæ æппарынц цæугæдонмæ. Дон дзы кæлы æви цавæрдæр æхсæнтæ, уый бæрæг нæй. Йæ цуры та адæймаг фæлæууын дæр нæ фæразы, афтæ дзы смаг кæны. Æнхъизæны амæттæгтæ сæ хъаст бахастой Æппæтуæрæсеон адæмон фронтмæ. Уыдон станицæмæ атындзыдтой, бынаты сбæрæг кодтой уавæр. Зæрдæхæццæгæнæн нывтæ федта нæ уацхæссæг Гогаты Марат дæр æмæ мæнæ йе `рмæг. Кæддæр Николаевскæйы станицæмæ æнæхъæн бинонтæй цыдысты улæфынмæ. Æнæвнæлд æрдз, сыгъдæг уæлдæф æмæ рæсуг дон.Толбегты Таймураз ма тынг хорз хъуыды кæны уыцы рæстæг. Йæ ныхæстæм гæсгæ, раздæр ам æрбынат кæнынмæ адæм бирæгæйттæй цыдысты. Ныртæккæ уавæр къæссавæлдæхт фæцис. Цалдæр промышленнон куыстуаты… æмæ раздæры сыгъдæг уæлдæф фæцыдæр ис. Цæугæдоны былтыл цы спъиртуадзæн заводтæ ис, уыдон сæ хауæццæгтæ калынц донмæ æмæ се смаг уæларвмæ арауы. Аххоссæгтæ сбæрæг кæнынмæ Æппæтуæрæсеон адæмон фронты бынæттон хайады уæнгты бирæ æнхъæлмæ кæсын нæ бахъуыд: спъиртуадзæн заводы хæтæлтæй цы лæхъир цыхцырæг кæлы, уымæй дон уайтагъд ацъæх вæййы. Цы зонын æй хъæуы, уыдон куыстуæтты хауæццæгтæ кæй сты. Æрмæст иу бонмæ цæугæдонмæ цас тæссаг хауæццæгтæ бахауд, уый специалистты бон дæр бæлвырд зæгъын нæу. Цалдæр километры сæ фæд бæрæг дары. Ныр цæмæй цæугæдон раздæры уавæрмæ `рцæуа, уый тыххæй дзы бахъæудзæн бирæ сыгъдæггæнæн мадзæлттæ аразын. Фронты уæнгтæ та сæ куысты хатдзæгтæ арвитдзысты прокуратурæмæ.