«Лики современного пианизма» зæгъгæ, зымæгон фестиваль ацæудзæн Дзæуджыхъæуы

Дзæуджыхъæуы дарддæр цæуы мариинаг театры «Лики современного пианизма» зæгъгæ, зымæгон фестиваль. Раздæр-иу цыд æрмæстдæр Санкт-Петербургы. Ныр йæ географи апарахат. Фортепианойыл цæгъджыты фестиваль æрæмбырд кæндзæн курдиатджын музыкантты æмæ аивадуарзджыты. Мадзал цæудзæн 23-æй 29-æм декабры онг. Фестиваль байгом уыдзæн Мариинаг театры Филиалы сценæйыл. Концертон программæ райдайдзæн пианист Гергиты Абысалы блокæй. Æвзонг мызыкант ныридæгæн хорз зонгæ у Дзæуджыхъæуы аивадуарзджытæн. Фортепианойыл ма ацæгъддзæн хъуыстгонд пианисткæ Мира Евтич. Оркестрæн разамынд дæтдзæн дирижер Гугкаты Зауырбег. Музыкалон бæрæгбоны архайдзысты Никитæ æмæ Даниила Абросимовтæ, Чайковскийы уацмыстæ ацæгъддзæн Александр Малофеев, пианист-виртуоз Кристиан Блэкшоу та фехъусын кæндзæн Вольфганг Амадей Моцарт, Франц Шуберт æмæ Людвиг ван Бетховены æнæмæлгæ уацмыстæ. Зæгъдзыстæм ма уый, æмæ фестиваль Санкт-Петербургы фæцæуы 21-æй 31æм декабры онг. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv