Хи къухтæй

Дур-Дуры скъола-интернат «Надежда»-йы хъомылгæнинæгтæн фæзынд хорз фадат ног дæсныйæдтыл сахуыр уæвынæн. Бацæттæ сын кодтой дыууæ сæрмагонд æрмадзы. Ныр уым цæттæ кæндзысты хъуыйджытæ æмæ хъæддæсныты. Куыд кусынц ног цехтæ æмæ сывæллæтты зæрдæмæ цас цæуы, уыдæттæ базыдтой не сфæлдыстадон къорды уæнгтæ. Залина Хавояшхова йæхи къухтæй æрмæст дзаума нæ бахуыйдзæн, фæлæ ма йыл исты рæсугъд нывæфтыдтæ дæр ацараздзæн. Куыд зæгъы, афтæмæй ацы куыстыл сахатгай дæр йæ бон бадын у. Раздæр-иу нывæфтыдтæ къухæй кодта, ныр та ныв хуыйæнгарзæй ахуыр кæны æфтауын. Скъола-интернат «Надежда»-йы хъомылгæнинæгтæн сцалцæг æмæ бацæттæ кодтой дыууæ æрмадзы – хуыйæн æмæ хъæддæсныйады. Сарæзтой сæ республикæйы сæргълæууæг Битарты Вячеславы уæлæмхасæн фонды фæрæзтæй. Ныр интернаты хъомылгæнинæгтæн ис æппæт хъæугæ фадæттæ æмбæлгæ дæсныйадтæ ахуыр кæнынæн. Хъомылгæнджытæ куыд фæбæрæг кодтой, афтæмæй æрмадзтæ тынг хъуыдысты сывæллæтты. Скъола-интернат «Надежда»-йы директоры хæдивæг Людмила Закрияева: «Æппæты вазыгджындæр сын у сæ профессионалон куысты ахуырад. Уымæн æмæ сын уый сæ фидæны дæр æххуыс у æхсæнады цæрын сахуыр уæвынæн. Республикæйы сæргълæууæджы æххуысæй дыууæ кусæнуаты сарæзтам – хуыйæн æмæ хъæды куыст кæнынæн. Ныр нæ лæппутæ ахуыр кæндзысты хъæды куыстыл, нæ чызджытæ та – хуыйыныл». Дыууæ æрмадзы дæр ис æппæт хъæугæ кусæнгæрзтæ. Хуыйæн цехы - 6 машинкæйы, æндæхтæ æмæ судзинтæ. Хъæды куысты цех дæр алцæмæй ифтонг у. Хъæуы ма сæ æрмæстдæр ахуыргæнæг. Республикæйы ахуырад æмæ наукæйы куыд зæгъынц, афтæмæй æнтыстджынæй архайынц сидзæр сывæллæтты æппæт республикон кусæндæтты дæр. Афтæ, Дур-Дуры скъола-интернат фарон сцалцæг кодтой. Хæстæгдæр рæстæг æппæт ахæм кусæндæттæ кæронмæ сифтонг кæндзысты. РЦИ-Аланийы ахуырад æмæ наукæйы министры хæстæ æххæстгæнæг Людмила Башарина: «Ахуырады национ проекты ис, сывæллæтты æхсæнады цæрынмæ цы кусæндæттæ цæттæ кæнынц, уыдон сифтонг кæныны программæ. Ахæм ахуыргæнæндæттæ нæм ис 4. Къæпхæнгай сæ алкæй дæр ифтонг кæндзыстæм национ проекты домæнтæм гæсгæ. Ацы аз уал уырдæм бахаудзæн, хорз чи нæ хъусы, уыцы сывæллæтты интернат. Фæстæдæр программæмæ ацы интернат дæр бафтаудзыстæм». Дур-Дуры ног æрмадзты куыст ныридæгæн бацайдагъ. Хъомылгæнджытæ куыд зæгъынц, афтæмæй сывæллæттæн тынг цæуы сæ зæрдæмæ. Уый та æппæтæй вазыгджындæр у. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv