Дзæуджыхъæуы аэропортæй хæстæгдæр фидæны байгом уыдзысты ног рейсытæ

Дзæуджыхъæуы аэропортæй хæстæгдæр фидæны байгом уыдзысты ног рейсытæ Сочи, Ростов æмæ Краснодармæ. Уый фæдыл республикæйы сæргълæууæг Битарты Вячеслав ныхас кодта авиакомпани «Азимут»-ы директорты советы сæрдар Павел Удодимæ. Рагагъоммæйы ныхас æмбырды архайджытæ бакодтой Сочийы инвестицион форумы фæлгæты. Фембæлды ма архайдта авиакомпанийы æххæстгæнæг директор Эдуард Теплицкий. Битарты Вячеслав куыд фæбæрæг кодта, афтæмæй Цæгат Ирыстоны уæлдæфон фæндæгты хызты райрæзтимæ фылдæр кæндзысты туризм æмæ бизнесы авналæнтæ дæр. Йæ хъуыдыйы ис тагъд рæстæджы Дзæуджыхъæу Уæрæсейы бирæ регионтимæ бабæттын. Æппæты хъæугæдæр балцвæдтæ сты Сочи, Ростов, Новосибирск, Сургут, Симферополь, Казань, Саратов, Самара, Уфа æмæ Тюмень. Цæгат Ирыстон йæ бюджетæй радих кодта 12 милуан сомы ног балцвæдтæ байгом кæныны тыххæй. Сæ фыццаг сты Ростовмæ рейсытæ. Уыцы фæрæзты руаджы авиабилетты аргъ адæмæн уыдзæн асламдæр. Уæ зæрдыл уын æрлæууын кæндзыстæм, компани «Азимут» Уæрæсейы Хуссары ног авиаласæг кæй у. Сарæзтой йæ Ростовы аэропорт «Платов»-ы бындурыл. Компанийы пайда кæнынц уæрæсеаг хæдтæхджытæ «Сухой Суперджет-100»-тæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv