Электрон чингуытæ

Скъоладзауты дæ фæтæрсын кæнын куы бафæнда, уæд сæм чиныг равдис. Куыдфæстæмæ ныры фæсивæд чингуытæ кæсын нал уарзынц. Стæй сæ цæмæн кæсой, кæд æмæ Интернеты хъæуа-нæ хъæуа базонинæгтæ - фагæй фылдæр. Цæмæй æрыгон фæлтæр бынтон ма ныкъкъуымых уа, уыйтыххæй сын аразын райдыдтой электрон чингуытæ. Сывæллæттæ ахæм хъазæнтыл, кæй зæгъын æй, бацин кодтой. Куыннæ ма, кæд æмæ сæм исты кънопкæтæ аралхъив-балхъив кæнынæй хуыздæр ницы кæсы. Фæлæ, цымæ, сæ ахуырыл та куыд фæбæрæг уыдзæн? Цавæр ногдзинæдтæ æрхæсдзысты нæ цардмæ электрон чингуыты сыфтæ, уый зонынц нæ уацхæсджытæ. Уырыссаг æвзаг æмæ литературæйы урок 3-æм «в» къласы ахуырдзаутæн сæ уарзондæр предметтæй иу у. Уыимæ ма ныр ноджы фенцондæр сты. Уый та уымæн æмæ ахуырадон æрмæджытæ: чингуытæ æмæ кусæн тетрæдтæ раивтой электрон хуызмæ. Сæлбиты Алан, Цæгат Ирыстоны информацион технологиты æмæ бастдзинады управленийы разамонæг: «Проекты автортæ фидæны фæнд кæнынц ногдзинæдтæ бахæссын. Фæфылдæр кæндзысты электрон чингуыты номхыгъд дæр. Проект та фылдæр скъолаты æххæст кæндзысты. Ууыл скъоладзаутæ дæр цин кæнынц. Кæмæндæр экранæй кæсын æнцондæр у, чидæр та чиныджы сыфтæ фæлдахын уарзы. Чи телефонæй æмæ компьютерæй чингуытæ кæсы, чи та йæ фæндаг чиныгдонмæ кæнæ чингуыты дуканимæ акæны. Уыдон бирæ сты. Чингуыты дуканиты уæйгæнджытæ куыд зæгъынц, афтæмæй адæмæн æмæ чингуытæй никуыдæй фæцæрæн ис. Фесæфынæй сын тас нæу, кæддæриддæр уыдзысты æмæ сæ ахадындзинад кæндзæн бæрзонддæр». Бæцæзаты Янæ: «Рауагъдады хъуыддаг абон рæзы. Фæзынди бирæ ног чингуытæ. Сæ нымæц тагъд рæстæгмæ кæмæн фæци, уыцы чингуытæ ногæй рауадзынц. Æнæуый чиныг куы февзарæм, уæд нын уый удæнцой дæтты, уымæн æмæ йæ дæ къухмæ куы райсай, уæд сыфтæм дæр баныдзæвдзынæ. Уый та цыдæр æнахуыр æнкъарæнтæ дæтты. Электрон чиныгмæ уыцы миниуджытæ нæй». Офтальмологтæ куыд зæгъынц, афтæмæй бирæ кæсын æмæ кæсыны уавæртæ не ххæст кæнын цæстытæ халынц. Фæлæ электрон æмæ гæххæттæй чынгуытыл дзургæйæ, иу хъуыддаг бæлвырд у. Хуымæтæг чингуытæ къаддæр зиан хæссынц цæстытæн. Бытъæты Лилия, æвæстиатæй æххуысы дохтыр: «Кæй зæгъынц æй хъæуы, хуыздæр гæххæттæй чиныг кæсын у. Электрон чингуытæй цæстытæ риссынц. Телефоны кæнæ компьютерты экрантæ цæстытæ æппынæдзух фæллайгæ кæнынц. Уыимæ ма электрон чингуытæ кæсгæйæ, цæстныкъуылд дæр стæмдæр хатт æрцæуы. Уый хорз нæу". Чи цы чиныг равзара, уымæй йæ бар - йæхи. Техникон прогресс бонæй-бонмæ размæ бырсы æмæ йын бауромæн нæй. Фæлæ специалисттæ гæххæттæй чиныгæн удхаудæй нæ тæрсынц. Ивгъуыд æнусы райдиан кино æмæ телеуынынадæй дæр афтæ дзырдтой, ома, дам, театр сæ быны ныссæнддзысты. Стыхджын сты кино дæр æмæ театр дæр. Фæлæ сценикон дæсныйад дæр æгайтма мæлынвæнд нæ кæны. Афтæ, æнæмæнг, уыдзæн гæххæттæй чиныджы хъысмæт дæр. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv