Дзæуджыхъæуы уыд Цæгат Ирыстоны хицауады æмбырд

Беслæны мадæлтæн баххуыс кæндзысты. Уый тыххæй хицауады æмбырды фехъусын кодта республикæйы социалон райрæзты министр Хуыбаты Барис. Йæ ныхæстæм гæсгæ ныридæгæн цæттæ кæнынц ног проект. Йæ фæлгæты, теракты цы сывæллæттæ фæмард, уыдоны ныййарджыты пенситыл бафтдзæн 3 мин сомы алы сабийы номыл дæр. Æдæппæтæй 79 адæймагæн. Фидæны аз ацы хъуыддагæн рахай кæндзысты 5 милуан æмæ 400 мин сомы. Хуыбаты Барис куыд бафиппайдта, афтæмæй уый у республикæйы æххуыс. Ногдзинæдтæ аххæсдзысты пенсион кары чи ис, уыдоныл. Проект йæ тыхы бацæудзæн 2020 азы 1-æм январы. Æмбырды ма æрныхас кодтой бынæттон хиуынафæйады уæнгты ивгъуыд азы куысты хатдзæгты тыххæй. Республикæйы экономикон райрæзты министр Томайты Хъазыбег фæнысан кодта муниципалитетты статистикон бæрæггæнтæ. 2018 азæй бынæттон администраци архайы амалхъомдзинады райрæзтыл. Сæ иумæйаг æфтиæгты бæрц у 64 миллиард сомы. Республикæйы амалхъом адæмы нымæц та у 4 мины. Бафтыдис ма скъолайы агъоммæ ахуыргæнæндæтты нымæцыл дæр. Афтæмæй, ивгъуыд аз республикæйы байгом сывæллæттæн 4 ног рæвдауæндоны. Иу ног рæвдауæндон ма фæзындзæн Дзæуджыхъæуы дæр. Бынат дзы уыдзæн 280 сабийæн. Уымæй уæлдай ма ивгъуыд аз хъæугæ уавæртæ сарæзтой физкультурæ æмæ спорты архайынмæ дæр. Сарæзтой æмæ сцалцæг кодтой спортивон залтæ, сифтонг сæ кодтой спортивон гæрзтæй. Æрдзырдтой цæрæнуæтты фарстатыл дæр. Афтæ, 2018 азы хæдзæрттæ эксплуатацимæ радтой 10% фылдæр. Республикæйы хицауады сæрдар куыд бафиппайдта, афтæмæй хъуыддæгтæ хуыздæры ’рдæм ивынц. Фæлæ аиуварсгæнинаг фарстатæ нырма ис. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv