Республикон психиатрион рынчындоны хайæдтæ бындуронæй рацарæзтой

Республикон психиатрион рынчындоны хайæдтæ бындуронæй рацарæзтой. Цæгат Ирыстоны сæргълæууæг Битарты Вячеславы уынаффæмæ гæсгæ, цалцæггæнæн куыстытæн республикон æмæ федералон бюджеттæй рахай кодтой 30 милуан сомы. Ныридæгæн уал, пъланмæ гæсгæ, сцалцæг кодтой дыууæ хайадæн сæ фыццаг уæладзгуытæ. Куыстытæ дарддæр дæр конд цæудзысты. Республикон психиатрион рынчындон фыццаг хатт бындуронæй цалцæггонд æрцыд 1975 азы. Уæдæй нырмæ дзы аивгæнæн куыстытæй уæлдай ницы конд уыд. Сæ фадæттæ дæр зæрдæйы фæндиаг нæ уыдысты. Ныридæгæн уал цалцæггонд æрцыдысты сылгоймæгты æмæ сывæллæтты хайæдты фыццаг уæладзгуытæ. Куыстытæ нырма кæронмæ æххæст не сты, сæвæрын ма дзы хъæуы зынгсирвæзты ныхмæ сигнал дæттæнтæ дыууæ хайады дæр. Кодзаты Эрик, Республикон психиатрион рынчындоны сывæллæтты хайады сæргълæууæг: «Цалцæггæнæн куыстыты сæйрагдæр хай конд æрцыд. Ам æрцыдысты сæрмагонд ивддзинæдтæ, уыдоны фæрцы фадат ис нырыккон уавæрты кусынæн, нæ сывæллæттæн та - райдзаст агъуыстыты уæвын». Цæгат Ирыстоны сæргълæууæг Битарты Вячеславы уынаффæмæ гæсгæ, цалцæггæнæн куыстытæн республикон æмæ федералон бюджетæй дихгонд æрцыд 30 милуан сомы бæрц. Техникон инженер Тотиты Тимур куыд бафиппайдта, афтæмæй ивгъуыд азы кæронæй фæстæмæ ам цыдысты цалцæггæнæн куыстытæ. Тотиты Тимур, техникон инженер: «Палатæтæ, процедурон кабинеттæ, сывæллæтты кæм уынынц, ахæмтæ, исæн уæттæ, уазæгдæттæ. Иу ныхасæй, ацы фарс сты дохтырты кабинеттæ, иннæ фарс та - рынчынты палатæтæ. Алцы дæр у нывылгонд». Ацы хайады ис 23 бынаты сывæллæттæн, 3 дзы сты боныгон, 20 та суткæгай.  Куыддæр бæстыхай кæронмæ арæзт æрцæуа, афтæ бавналдзысты сывæллæтты дзæбæх кæнынмæ, нырыккон домæнтæн дзуапп чи дæтты, ахæм технологиты фæрцы. Кодзаты Эрик, Республикон психиатрион рынчындоны сывæллæтты хайады сæргълæууæг: «Уымæй уæлдай ма нырыккон технологиты домæнтæм гæсгæ фæнд кæнæм кусын куыд территориалон, афтæ инструменталон методикæтæй пайдæ кæнгæйæ. 4 азæй 15 азы онг сывæллæттæн уыдзæн æппæт фадæттæ дæр низ дзæбæх кæнынæн, мах рынчындонмæ чи æрбахауа, уыдонæн. Вæййынц алыхуызон низтимæ, зонды, ныхасы къуылымпытимæ, аутизмимæ дæр æрбахауынц». Дыууæ корпусы дæр арæзт сты æмхуызон. Сæ иу хайы дохтырты кабинеттæ, иннæйы та - рынчынты палатæтæ æмæ хæрæндон. Цалцæггæнæн куыстытæ цалынмæ цæуынц, уæдмæ рынчынты рæстæгмæ раивтой æввахсдæр хайадмæ. Афæдз фæстæ ма ноджы дæр 2 хайады аразынвæнд кæнынц. Айларты Эмилия _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv