Абон Ирыстоны цæрджытæй бирæтæ сбæрæг кæндзысты æнæзæгъинæгты æхсæв

Абон Ирыстоны цæрджытæй бирæтæ сбæрæг кæндзысты æнæзæгъинæгты æхсæв. Хонынц ма йæ хæйрæджыты, йе та дæлимонты, кæнæ нæфæтчиаг æхсæв дæр. Вæййы Ног боны агъоммæ, æртыццаджы æхсæв. Зæронд æмæ ног нымадмæ гæсгæ, алы бонтæм кæй хауынц, уымæ гæсгæ фæиртæст сты зымæгон бæрæгбæттæ дæр. Йæ сæйраг нысан у бинонты æвзæр тыхтæй бахъахъхъæнын. Адæмы уырнынадмæ гæсгæ, цæмæй афæдзы дæргъы бинонтæ хæйрæджыты фыдæхæй хызт уой, уый тыххæй сын нывондæн æрхæссынц сау карк кæнæ сæныкк - йæ къух кæмæн куыд амоны, уымæ гæсгæ. Сæ ис, сæ фæллойæ сын фæхай кæнынц, цæмæй сæ иннæ ацафонмæ мацæмæй батыхсын кæной, бинонты ма бахъыгдарой, хæдзары фарн ма фæцудын кæной. Ацы изæр æфсинтæ скæнынц дыууæ кæрдзыны æмæ дыууæдзыхон гуыл хæйрæджыты кæстæр сывæллонæн, зæгъгæ. Сцæттæ кæнынц фынг. Фынгыл не ’вæрдæуы кард æмæ цæхх. Уæдæ нывонд хойрагмæ цыргъагæй дæр нæй æвналæн. Фынгæвæрд скæнынц æмæ йæ, хæдзармæ бар чи дары, уыдонæн ныххæлар кæнынц. Хойрагæй æцæгæлон адæймагæн саходæн нæ вæййы. Абон уыцы æгъдæуттæм лæмбынæг сæ хъус нал дарынц, фæлæ ма уæддæр ацы æхсæв бирæтæ бæрæг кæнынц. Хæйрæджыты æхсæв æмæ Бынаты хицауы бæрæгбон цæмæйдæрты æмхуызон сты, фæлæ сæ мидис иу нæу. Бынатæн æртæ чъирийы кæнынц афæдзы алы афон дæр. Æнæзæгъинæгтæн та афæдз иунæг хатт, Цыппурсæй - Ног боны ’хсæн æртыццæг æхсæв. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv