Дзæуджыхъæуы тæрккъæвда æмæ тыхджын дымгæйы фæстиуджытæ иуварс кæнынц коммуналон службæтæ. Æрдздых фылдæр бахъыгдæрдта Ирыстойнаг район. Ватутины уынджы 17-æм «Б» хæдзары цур, 13-æм скъолайы районы æмæ Колыты Аксойы номыл скверы бæлæстæ афæлдæхтысты. Бынæтты кусынц куыстуат «Зеленстрой»-ы бригадæтæ. Цыбыр рæстæгмæ фæлдæхт бæлæстæ афаддзысты æмæ аласдзысты. Фæскъæвда горæты районты уавæр куыд у, уый специалисттæ бæрæг кæнынц дарддæр. Куыстуат «Владсток»-ы минæвæрттæ сарæзтой къӕвдадоны канализацийы басгæрст. Цалдæр ран дымгæ люкты сæртæ систа. Ныртæккæ боныхъæды фæстиуджытæ иуварсгæнæн куыстытæ сты сæ тæмæны.