Ацæргæ æмæ цудыд æнæниздзинадимæ адæмæн ног хæдзар-интернаты арæзтад фæнд кæнынц фидæны азы райдайын. Уый тыххæй пресс-конференцийы радзырдта республикæйы фæллой æмæ социалон рæзты министр Айдарты Алинæ. Зæххы хай радих кодтой Реданты. Ныридæгæн курдиаты фæдыл дзуапмæ æнхъæлмæ кæсынц Уæрæсейы фæллойы министрадмæ. Ныхас ма цыд сæрмагонд æфсæддон операцийы архайджыты реабилитацийыл. Се 'нæниздзинад фæхъæддыхдæр кæнын сæ бон уыдзæн санаторитæ «Ирыстон» æмæ «Сосновая роща»-йы, уыимæ ма ноджы 3 сæрмагонд уагдоны. Инфраструктурæ сног кæнынмæ сæм фæкæсдзæн бæстæйы фæллойы министрад. Уымæй уæлдай, Айдарты Алинæйы ныхæстæм гæсгæ, фæнд кæнынц æфæсддон цауты инвалидтæн бирæвæрсыг реабилитацион центр саразын дæр. 1300-мæ 'ввахс социалон контракты фæнд кæнынц бафыссын ацы аз. Æххуысы мадзал хи куыстуат байгом кæнынæн у ахъаз. Æдæппæтæй сты 4 къабазмæ гæсгæ. Уыдонæй парахатдæр сты амалхъомад æмæ хи хæдзарады райрæзт. Хицæнæй ныхас цыд сæрдыгон дзæбæхгæнæн кампанийыл. Æдæппæтæй ацы аз баулæфдзысты 36 мин сабимæ 'ввахс. Уыдонæй 2 мин сæ рæстæг арвитдзысты Сау денджызы был. Уыимæ ма, ацы аз фыццаг хатт байгом кодтой йе 'нæниздзинад хъыгдæрд кæмæн у, ахæм сывæллæттæн сменæ.