Не `взаг - йæ хæзна

Адæммæ диссаг чи кæсы, ахæм хабарæй райдайдзыстæм нæ равдысты дыккаг хай. Хæссы уырыссаг мыггаг, фæлæ у ирон æвзаджы ахуыргæнæг. Стæй ахæм зæрдæргъæвд, æмæ йæ дæсны куыстæй сабиты сразæнгард кæны мадæлон æвзаг ахуыр кæнынмæ. Уыдон æй бауарзынц æмæ свæййынц, национ культурæ дарддæр чи ахæсдзæн, ахæм фæсивæд. Уыцы фæзминаг ахуыргæнæг у Наталья Квашнина. Уырыссаг мыггаг хæсгæйæ, ирон æвзагыл ахуыр кæны Дзæуджыхъæуы 27-æм скъолайы ахуырадзауты. Не сфæлдыстадон къорд бабæрæг кодта Натальяйы урочытæ. Нæ уацхæсджытæ сæхи цæстæй федтой, дæ куыст куы уарзай, уæд ыл сывæллæттæ дæр æнувыд вæййынц. Наталья Квашнинайæн ирон æвзаг сси мадæлон æвзагæй адджындæр. Йæ урокты дæр архайы сабиты ирон æвзаг æмæ литературæ ахуыр кæнынмæ разæнгард кæныныл. Алы урокмæ дæр йæхи бæстон æмæ зæрдиагæй бацæттæ кæны. Куыд зæгъы, афтæмæй цæмæй æнтыстджын рауайа æмæ ахуыргæнинæгты сцымыдис кæна, уый тыххæй сын æппынæдзух чингуытæй ахизгæйæ бацæттæ кæны уæлæмхасæн æрмæджытæ. Сывæллæттимæ кусын Наталья бирæ уарзы. Йæ уроктæм се 'ппæт дæр фæцæуынц зæрдæрайгæйæ. Уымæн æмæ йæ зонынц, сæ алы урок дæр уыдзæн цымыдисаг æмæ алывæрсыг. Наталья канд урокты нæ архайы йæ ахуыргæнинæгтæм ирон æвзаг æмæ литературæмæ уарзондзинад гуырын кæныныл, фæлæ ма фæсурокты дæр. Ахоны сæ театр æмæ музейтæм. Йæ сабибонтæй фæстæмæ Натальяйæн йе стырдæр бæллицтæй иу уыд йæ цард скъолаимæ сбæттын. Уæлдай æнувыд та уыд ирон æвзагыл. Скъолайы фæстæ Наталья бацыд Цæгат Ирыстоны паддзахадон университеты райдиан кълæсты ахуыргæнджыты факультетмæ. Уый фæстæ кусын райдыдта йæ райгуырæн хъæу Бирæгъзæнджы скъолайы. 1996 азы та йын фадат фæцис Дзæуджыхъæуы 27-æм скъолайы кусынæн. Уæдæй абонмæ йæхи равдыста куыд бæрнон æмæ дæнцæгæн хæссинаг кусæг. 23 азмæ Наталья йæ равзæрст дæсныйадыл иу хатт дæр нæ фæфæсмон кодта. Абон йæ цард æнæ скъолайæ йæ цæстытыл уайгæ дæр нал кæны. Йæ хуыздæр хæрзиуæгыл та нымайы йæ ахуырдзауты æнтысдзинæдтæ. Уазиты Зæлинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv