«Академион кълас» фæлварæны хуызы фæзындзæн Уæрæсейы 8 регионы

Проект «Академион кълас» фæлварæны хуызы фæзындзæн Уæрæсейы 8 регионы. Æххæст кæнын æй райдайдзысты Санкт-Петербургы, Карелийы, Татарстаны, Башкирийы, Цæгат Ирыстоны, Пермы крайы, Новосибирскы æмæ Ивановы облæстты. Ахæм хъæппæрис рахаста Уæрæсейы ахуырад æмæ наукæйы министрад. «Академион кълас»-ы проект Мæскуыйы кусы 2016 азæй. Йæ сæйраг нысан у скъоладзауты бафтауын проектон архайд æмæ наукон-иртасæн куыстыл. Уый руаджы сын фидæны дæсныйад равзарын уыдзæн æнцондæр. Сæрмагондæй наукон куыст кæм хъæуы, экономикæйы уыцы къабæзты. Ахуырдзаутæ фæцалх вæййынц ног иртасæн методтыл, райсынц фæлтæрддзинад се ’мгæрттæй æмæ семæ чи фæкусы, уыцы зындгонд ахуыргæндтæй. Проекты куратор Ирина Чугуевайы ныхæстæм гæсгæ, проектыл бакусæн ис проектон-ахуырадон центрты. Центртæ арæзт цæуынц Уæрæсейы регионты нацпроект «Наука»-йы фæлгæты. Афтæмæй уæлдæр ахуыргæнæндæттæн фадат уыдзæн хи специалистты æрбахонын. Регионты та ахуырадон-наукон къабазы фæзындзæн дæсныдæр специалисттæ. Гæнæ ис æмæ «Академион кълас»-тæ фидæны фæзындзысты Уæрæсейы иннæ регионты дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv