Электросамокаттæ нæ горæты арæх фенæн ис. Диссаг никæмæ уал кæсынц. Сты цырд æмæ æнцонархайд. Фæлæ ма уыимæ тæссаг дæр. Хистæрæй - кæстæрæй, самокатыл чи фæцæуы, уыдонæй айрох вæййынц æдасдзинады домæнтæ. Афтæмæй, халынц фæндаггон змæлды фæтк. Бон раздæр Паддзахадон автоинспекцийы кусджытæ æркастысты уавæрмæ. Сæрмагонд рейд расидтысты Дзæуджыхъæуы. Раиртæстой бирæ уагхæлдтытæ. Не 'сфæлдыстадон къорд уыд семæ. Дзæуджыхъæуы уынгты самокаттыл чи цæуы, уыдон арæх къуылымпы кæнынц фæндаггон змæлд. Æрыгæттæ йыл хатгай дыууæйæ дæр слæууынц, æдасдзинад сæ ферох вæййы, афтæмæй. Паддзахадон автоинспекцийы æмæ горæты администрацийы кусджытæ æркастысты дыууæцалхон транспорты æвæрæн æртæ бынатмæ. Се 'ппæты дæр дзы ссардтой аиппытæ. Инспектортæ, кæй зæгъын æй хъæуы, сывæллæттыл закъоны бындурыл не `фхæрынц. Семæ фылдæр профилактикон ныхас кæнынц. Сæ ныййарджытæм дæр сын фæдзурынц. 1-æм мартъийæ фæстæмæ электросамокат нымад у транспорты хуызыл. 7 азы онг цы сывæллæттыл цæуы, уыдонæн дзы бар ис æрмæстдæр къахвæндæгтæ кæнæ тротуартыл пайда кæнынæн, сæ ныййарджыты `вджид куыд уой, афтæмæй. 7 азæй 14 азы онг кæуыл цæуы, уыдонæн уыцы рæтты ис хибарæй цæуыны бар. Фæлæ сæ самокаты уæз 35 килограммæй фылдæр хъуамæ ма уа. 14 азæй фылдæр кæуыл цæуы, уыдоны бауагътой фæндаджы рахиз фарсы кæрæттæм, тротуар кæнæ къахвæндаг кæм нæй, ахæм рæттæм. Электросамокаттæ нæ горæты фылдæрæй-фылдæр кæнынц. Семæ баст быцæутæ дæр - афтæ. Бирæтæ сæ пайда кæнынц куыстмæ кæнæ ахуыры бынатмæ рæвдз бахæццæ уæвыны тыххæй. Фæсивæд та сыл цæуынц хи аирхæфсыны æфсонæй. Арæх халынц фæндаггон змæлды фæтк. Самокаттыл дугъы уайын цы бынæтты æмбæлы, куыд тагъд æмæ йæ бауромæн кæм ис - æппæт уыдæттæн ныр аразынц сæрмагонд фæтк. Ныртæккæ транспортон фæрæзтæ хаццоны чи дæтты, уыцы оператортæ аразынц картæ Дзæуджыхъæуы ахæм бынæттимæ. Уæдæ сæ пайда кæнын куыд æмæ кæм æмбæлы, уыцы фæткыл та бакуыстой Дзæуджыхъæуы администрацийы. 18 азæй фылдæр кæуыл цæуы, æмæ самокаттыл цæуыны фæтк чи хала, уый ивар кæндзысты 800 сомæй 1 мин сомы онг. Специалисттæ сидынц адæммæ, цæмæй æдасдзинады домæнтæ ма рох кæной æмæ фæндаггон змæлд ма халой.