Уæрæсейы экономикон райрæзты министрады æрдзырдтой Цæгат Ирыстоны социалон-экономикон мадзæлттыл

Цæгат Ирыстоны социалон-экономикон райрæзты фарстатыл дзырдтой Мæскуыйы. Ныхас цыд æнæниздзинад хъахъхъæнынад, ахуырад, культурæ æмæ æндæр ахсджиаг къабæзты объектты арæзтад æмæ цалцæгыл. Æмбырды архайдтой Уæрæсейы экономикон райрæзты министры хæдивæг Сергей Назаров, республикæйы хицауады сæрдар Дзанайты Барис æмæ дзуапдæттæг федералон органты минæвæрттæ. Премьеры ныхæстæм гæсгæ, ныртæккæ социалон-экономикон райрæзты мадзæлтты номхыгъды ис 112 пункты, хъæуы сæ сæххæст кæнын 2026-æм азы онг. Афтæ, 2023-2025 азты бюджетмæ нысангонд æрцыд 6 млрд сомы 56 мадзалæн. Сергей Назаров куыд фæнысан кодта, афтæмæй Беслæны генералон пъланмæ гæсгæ куыстытæ 2024-æм азы онг сæххæст кæнын хъæуы. Уæд Беслæны 1-æм скъолайы терактыл рацæудзæн 20 азы.