КВН-ы ног командæ

Цæгат Кавказы паддзахадон университеты къорд «Город»-313 цæттæ у ног фæлтæрæнмæ. 10 лæппуйы æмæ 1 чызг кæрæдзи æмбаргæйæ сæ къахдзæфтæ иумæ кæнынц. КВН-ы фыццаг лигæмæ бахауын сæм нырма ницы кæсы. Цин кæндзысты, уæлахиздзаутæ куы суой, уæд. Кæм хъæуы, уым та сæ-иу хъазæн ныхас дæр схаудзæн.  Цы хъуыды кæнынц ацы ахсджиаг хабары тыххæй æмæ сæм цы фæндтæ ис? Уый базыдтой не сфæлдыстадон къорды уæнгтæ дæр. Cценæйыл худæг, сценæйы фæстæ та - дзырдарæхстытæ. Ам вæййы æппæты ахсджиаг архайд - ног хъуыдыты, радзырдты æмæ худæг цауты равзæрд. Аивадуарзджытæ та фенынц сæ архайды кæронбæттæн хатдзæгтæ - бирæ сахæттæ цæуыл бахардз кодтой, уый. Сæ хъазæн ныхæстæ сын нæ хæлæг кæнынц. Сæ гæнæнтæ æгæрон кæй сты, æмæ æрхæндæг адæймаджы дæр кæй схудын кæндзысты, уый алчидæр зоны. Дудайты Владислав, командæйы уæнг: «Ацы куыст цæмæй хъуамæ рауайа, уый тыххæй хъæуы бирæ рæстæг хардз кæнын. Рамбулыны тыххæй хъуамæ дæхиуыл ахадгæдæрæй кусай, фæлтæрдзинад уымæй фыдæрæй-фылдæр кæны. Вæййы афтæ, æмæ адæймаджы командæйæ ацæуынмæ бирæ нал фæхъæуы. Фæлæ цæмæдæр гæсгæ афтæ нæ бакæнын». Ацы фæсивæд сæ куыст кæй уарзынц, уый бæрæг у. Сæхицæн æхсызгондзинад æмæ удæнцой та куыд нæ хæссынц. Фыццаг, Цæгат Ирыстоны Паддзахадон универститы къорд "Город 313"-ы 7 адæймаджы йеддæмæ нæ уыд. Фæлæ рæстæг куыд цыд, афтæ сæ къордыл бафтыд. Бирæты сæм бафæндыд. Абон сты 11-æй. Иннæтæй сæ хицæн кæны канд сæ куыстмæ уарзондзинад нæ, фæлæ ма сæ уæздандзинад æмæ æфсарм. Куыд зæгъынц, афтæмæй КВН-ы Фыццаг Лигæмæ бахауын размæ гыццыл къахдзæф йеддæмæ нæу. Тугъанты Зауырбег, командæйы уæнг: «Цы нын бантыст? Нырма ницы. Уыцы лигæмæ нырма æрмæстдæр хаугæ бакодтам. Уырдæм бахауын - уый иу хъуыддаг у, фæлæ дзы хи равдисын та - æндæр. Æмæ уый зындæр у. Мæнæ нæхи хорз куы бацæттæ кæнæм нæ номертимæ, æмæ ма нæ Уæлдæр Лигæмæ куы бауадзой, уæд сæрыстыр уыдзыстæм. Фæлæ нæ нырма нæхиуыл бакусын хъæуы». Командæйыл 3 азы цæуы. Сочийы фестивалы ацы къорд уыд æппæты хуыздæр. Фæсивæд сæхæдæг фыссынц тексттæ. Редактортæ сын æрмæст стæм хатт исты баивынц. Джиоты Давид æмæ Козаты Нугзар ацы командæйы сты йæ фыццаг бонтæй. Æмæ кæд райдианы æнæуæндон юмористты къорд уыдысты, уæд абон та - æнгом бинонты хуызæн. Козаты Нугзар, редактор: «Ацы фæсивæды раздæр уырныдта, хъазæн ныхæстæ кæнын сæ бон кæй у, уый. Фæлæ куыд разынд, афтæмæй уый раст нæ уыд. Ныр æй æмбарынц, кæм ницæйаг ныхас кæнынц, кæм та цæттæ юморæй нæ зæрдæтæ ахъæлдзæг кæнынц. Алцыдæр аивта. Актеры дæсныйады сусæгдзинæдттæ хуыздæр базыдтой». Командæ "Город 313" - Цæгат Ирыстоны у æртыккаг къорд, телевизорæй кæй æвдисынц, ахæм. Æдæппæтæй лигæтæ сты 4: Фыццаг, Æппæтдунеон, Премьер-лигæ æмæ кæй зæгъын æй хъæуы - Уæллаг. Лигæты хъæзтыты рæстæг нæ республикæ кæддæриддæр хуыздæрты хсæн вæййы. 1996-æм азы уыцы номхыгъды уыдысты "Владикавказские спасатели", 2006-æм азы "Пирамида". 2016 азы та Цæгат Ирыстоны Паддзахадон универститы командæ "Город 313". Специалистты хъуыдымæ гæсгæ, гæнæн ис, æмæ сæ Фыццаг каналы хъæзтытæм бауадздзысты. "Владикавказские спасатели"-тæй иу Плиты Сослан йæ зæрдæ дары, ацы къордæн бирæ кæй бантысдзæн, ууыл. Плиты Сослан, РЦИ-Аланийы КВН-ы паддзахадон театры директор: «Фыццаг лигæмæ бахауынц Фыццаг каналы кæй равзарынц, уыдон. Схъæлæс сыл кæнынц иууылдæр. Казаны фыццаг лигæйы редактор Айдар Гараев у Уæллаг лигæйы редактор дæр. Цæгат Ирыстоны Паддзахадон университеты къорд "Город 313" 1-аг Лигæмæ кæй бахаудтой, уый æппæты хуыздæр бæрæггæнæн у. Сахуыр сæ кæндзысты. Фæлтæрдзинад дæр сæм фæзындзæн æмæ мæ ныфс ис, иннæ сезон сæм телевизорты кæй кæсдзыстæм, уымæй». Телевизормæ бахауыны конкуренци фæфылдæр. Кæд-иу 10 азы размæ Сочийы фестивальмæ 50 командæйы ссыдысты, уæд ацы аз уыдысты 500 командæйы. Бирæ домæнтæ сæм ис, фæлæ кæронбæттæн хатдзæг та иу - алкæй бахъæлдзæг кæнын дæр хъуамæ зонай. Хъæлдзæг ныхæстæ æрхъуыды кæнынæн та æрыгæттæн мæйæ къаддæр баззад. Пелиты Сабина, Виктория Базгадзе, Ирыстоны Хабæрттæ. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv