Схæц ныххæц..

Нæ горæты æппæты дæргъвæтиндæр арæзтад та ногæй адæмы сæнкъуысын кодта. Ныхас цæуы, Дзæуджыхъæуы сæйраг парчы цы 13-уæладзыгон бæстыхай ис, ууыл. Йæ уавæрыл та йын радон хатт æрдзырдтой 21-æм августы, æхсæнадон æркасты. Бæстыхай ныууадзын, фæлæ зæххы юридикон нысаниуæг аивын. Ахæм хъуыды бирæты зæрдæмæ фæцыд. Ныхмæлæуджытæ дæр ын разынд. Ацы æрдæгарæзт бæстыхай сывæллæтты цады бынаты сæвзæрд 2004 азы. Афтæмæй та дзы хъуамæ аквапарк фæзындаид. Бæстыхай уайтагъд рæзын райдыдта, фæлæ аквапаркмæ ницы бар дары, уый æрæджиау рабæрæг. Æнæзакъонæй йæ сарæзтой, уый дæр. Ныр 10 азæй фылдæр горæты цæрджыты, уазджыты цæст къахы. Фыццаг сфæдис кодтой бæстыхаймæ хæстæг хæдзæртты цæрджытæ. Куыд зæгъынц, афтæмæй йæ аразджытæ куыстой кæнæ æхсæвы, кæнæ та къуырийы кæрон. 2005-æм азы августы мæйы ацы бæстыхайы арæзтады фæткыл фæдызæрдыг сты культурон нысаниуæгимæ объекттæ хъахъхъæнджытæ дæр. Арæзтад уæддæр нæ банцад. Национ хæзнатæ хъахъхъæн æг кусæндоны директор Габойты Людмилæ: «Бæрæг у, сайгæ кæй кодтой, уый. Аквапарк 12-уæладзыгон бæстыхаимæ искуы исчи федта? Уæлдайдæр мах горæты, егъау бæстыхæйттæ кæм нæ фидауы, уыцы ран. Терчы былгæрон, уымæй дæр... Уый хъуамæ ма рцыдаид. Дзæуджыхъæуы генералон пъланы йын бынат нæ уыд, уæдæ хъахъхъæд рæтты дæр – афтæ». Культурæйы министрад бахъаст кодта арæзтадон компанийыл. Арбитражон тæрхондон уынаффæйы фæстæ быцæугæнджытæ иу ныхасмæ `рцыдысты. Сæ иу сразы æртæ уæладзыгæй фæстæмæ иннæтæ фæстæмæ райхалын. Фæлæ тæрхондоны уынаффæ æрмæст уынаффæйæ баззад. Уæладзгуытæ халгæ нæ, фæлæ ма сыл ноджыдæр бафтыдтой. Стæй йæ уæвгæ дæр ныууагътой æрдæгкондæй. 14 азы — нæдæр иуырдæм, нæдæр — иннæрдæм. Ныр горæты администраци хъуыддагмæ ногæй йе `ргом аздæхта. Августы æхсæнадон æркæстыты архайджытæ бауынаффæ кодтой, цæмæй бæстыхай культурон нысаниуæгимæ объекттæм мацыуал бар дара. Уæд ын йæ хъысмæт æнцондæрæй ис равзарæн. Фæлæ та уæд алфамблай цæрджытæ ногæй сабухтой. Бынæттон цæрæг Гетъойты Терезæ: «Мах æргом фыстæг арвыстам нæ республикæйы сæргълæуджытæй алкæмæдæр. Æнхъæлмæ кæсæм дзуаппмæ. Бамбарын нæ фæнды, ацы бæстыхай ам закъоны бындурыл сарæзтой æви нæ, уый. Стæй тæрхондоны уынаффæ æнæххæстгондæй цæмæн баззад, уый дæр». Хъуыддаг хæрз хуымæтæг у. Нæ горæты историон нысаниуæг цы хайæн ис, уым нæдæр хæдтулгæтæн бацæуæн фæндæгтæ нæй, нæдæр æрлæууæн бынæттæ. Афтæмæй ахæм егъау комплексы æнæмæнг бахъæудзысты. Бынæттон цæрæг Джусойты Анжелæ: «Нæй уыдæттæн аразæн, махæн та сæ нæ фындзы бын амайынц. Раст мæнæ нæ цæрæн хæдзары дæргъæн уыдзæн. Паркмæ дæр бавнæлдтой, бæлæстæ акалдзысты æви нæ, уый дæр нæ зонæм». Рæстдзинады тыххæй йæ хъуамæ зæгъæм. Цæрджыты курдиæттæ æнæрхъуыдыйæ нæ баззадысты, дзуапп сын радтой. Уæдæ инвестортæ дæр сæ фæндоныл дызæрдыг нæ кæнынц. Æрдæгарæзт хæдзарæй хъуамæ сфæлдисой туристон хæзна. Фæлæ сæ хъуыдытæ æргом зæгъынмæ нæ тагъд кæнынц. Арæзтадон компани «Астам»-ы генералон директоры хæдивæг Дзгойты Эдуард: «Адæмы истæй ныхмæ радзурыны амал йеддæмæ æндæр ницы иу кæны. Афтæмæй та, арæзтад кæронмæ куы ахæццæ уаид, уæд цæсты ахадид. Нæ зæрды дзы ис фысымуат æмæ офисон кусæндæттæ саразын. Цы хæрдзтæ йыл хъуамæ бакæнæм, уыдон сты 400 милуан сомы. Куыд уæм кæсы, уыйбæрц фæрæзтæй исчи куыдфæндыйы цæстæй кæсгæйæ спайда кæндзæн?» 18-æм сентябры та ногæй цæудзысты æхсæнадон æркæстытæ. Фембæлды инвестортæ хъуамæ равдисой сæ проект. Лæмбынæгдæр хъуамæ радзурой, ацы бæстыхайæ куыд спайда кæндзысты, уый. Æхсæнадон æркæстытæм йæ бон æрбацæуын у алкæмæн дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv