Фæлтæрддзинад — хотых

Республикон онкодиспансеры уыд сылгоймаджы риуы æвзæрниз дзæбæхгæнæнæн дæсныйад æвдисæг ахуыртæ. Семинар сарæзтой Уæрæсейы Блохины номыл онкологон центры специалисттæ. Зынгонд онкологтæ равдыстой сæ фæлтæрддзинад æрыгон дохтыртæн. Мæскуыйæ ссыдысты хирург, химиотерапевт, морфОлог, тынтæй диагност æмæ радиотерапевт. Æвзæрниз æнæ ацы специалисттæй адзæбæх кæнæн нæй. Дзырдæн зæгъæм, Цæгат Ирыстоны ацы низы тыххæй хыгъды ис 3500 адæймаджы. Буары уæлцъары æвзæрнизы фæстæ ацы рын ахсы дыккаг бынат. Онкодиспансеры сæйраг дохтыры ныхæстæм гæсгæ фæстаг азты уавæр чысыл фæхуыздæр. Кæй адзæбæх кодтой, уыцы сылгоймæгты нымæцыл бафтыд. Цæмæй уыцы фæтк дарддæр дæр хуыздæр кæна, уый тыххæй низ хъæуы рагагъоммæ раиртасынæн алыхуызон мадзæлттæ аразын. Дохтыртæм хъæуы арæхдæр цæуын, æнæниздзинадмæ та фылдæр æргом здахын. Уæлдайдæр та 40 азы кæуыл сæххæст уыцы адæмы. Республикон онкологон диспансеры сæйраг дохтыр Бесаты Аслæнбег: «Сылгоймаджы риуы æвзæрниз дзæбæх кæнынæн уавæртæ зынгæ фæхуыздæр сты. Уæдæ нæ бæрæггæгæнæнтæ дæр афтæ. Ацы æвзæрнизы хуыз раст дзæбæх кæнынæн нæм ис æппæт хъæугæ кусæнгæрзтæ. Уæдæ медицинæ дæр йæ бынаты нæ лæууы, ахуыргæндтæ уадзынц ног хостæ, ног мадзæлттæ. Уыдæттæ хынцгæйæ, абоны ахуыртæ махæн сты тынг ахсджиаг». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv